Ako pasate po Trinajstoj divizije, oteli to al ne, sako tuliko ćete se fermat. Ta ulica, al šetalište, al šetnica, kako se danaska uža reć, na svoj je način povjesni monument Sušaka i jednoga lipoga dana, do jedno sto al dvisto let, kad budući Sušačani ovdeka budu kopali usjek za kakovu futurističku autostradu, čudon će se čudit ča će se tu nać i na se strane mahat svojemi povjesnemi otkrićima.
Zamimo leh izlaznicu ča od raskrižja na Rečine gre jednen krakon prama preseljenoj Piramide, a drugen prama Trinajstoj divizije. I česa ćete se spametit? Ničesa! Aš, asfaltna kačka poprtila se prama Piramide i zdol nje ustale su leh smeti i betonski stupi na kemi ta čakča leži. A tu je negdar bil del grada, del Sušaka. Ma, ta zaobilaznica al izlaznica, al nazovite ju kako god vas volja, rasteretila je centar Rike. Va to vrime kad je zgrajena tvrdilo se j’ da su tako auti va centru došli do arije. Tako saki put reču kad kopaju neku novu cestu, ma prava j’ istina da j’ ta kačka pomogla kod ča običan aspirin more pomoć teško bolnomu. Aš, z autimi j’ tako, ča jin više cest storiš, njih je se više, se su veći i nigdar jin ni dosti.
Danaska Piramida stoji ponosno va svojen kantuniću i niki ju već ne abada. Po pločami okolo nje ćapalo se trulo lisje, smeti i karta od pojidenih hamburgeri i pasala j’ huje leh kakov bolni penzioner kad štrajkaju duhtori. Malo naprvo, po Trinajstoj divizije, skalini su streljaneh hrvackeh rodoljubi. Ti skalini danaska niš ne znače, aš sad su va mode domoljubi, a ne rodoljubi. Zač je tako? Zato aš se ne more reć »Za rod spremni!«, a »Za dom spremni!« se tako udomaćilo da bez njega ne more pasat ni jedan rok koncert, al kakova tekma. To j’ morda zato aš je danaska važneji dom leh rod. Brata al sestru ne moreš prodat, a dom ti na saki sakramentski kvadrat nosi lipi soldi. Ča morda ni tako?