Jesen v Opatije; Volosken i Lovrane 2011. leta bit će zapamćena po ten ča je bila izuzetno tepla i puna sunca. Isto tako, bila je to jesen va koj su se, Janu Berndu Urbanu i portalu Liburnija.net zahvaljujuć, ljubitelji pasanega vremena i štorij od naše prošlosti, mogli navadit i više saznat od hrabreh kvarnerskeh mornari ki su još davnega 1872. leta »tukli more« i imeli srca za polarnu ekspediciju na Sjeverni pol. Zvali su jih Quarneroli, a štoriju smo čuli od opatijskega zaljubljenika va povijest i autora dve opatijske i jene lovranske izložbi njin va čast – Jana Bernda Urbana.
Kako je povedel Urban, po lete pred nekeh 138 let, otkrivena je Zemja od Franjota Josipa – ruska grupa otok va Arktičken oceane. Tisto su otočje 30. augusta 1873. leta otkrili austrougarski istraživači Karl Weyprecht i Julius von Payer, pokle ča njin se je brod Admiral Tegetthoff (nazvan po slavnen admirale ki je kod Visa potukal talijansku mornaricu – brod na jedra z tri jarbola i parnen strojen) inkaštral va lede dokle su razbijali glavu kako zivuć živu glavu, aš njin se je brod zaglavil va lede dokle su gjedali kako bi pronašli sjeveroistočni prolaz.
Ki voli povijest i geografiju, mogal bi dosti znat od ekspedicije Tegetthoff, ma do sada se ni dosti povedalo ni pisalo od tega da je va posade ovega broda bilo čuda Hrvati. Na Tegetthoffu je tako bilo i nekoliko Rečani (Anton Večerina, Petar Falešić, Juraj Štiglić, Lovro Marola), jedan Istrijan (Josip Latković) i tri mornara z liburnijskega kraja – Jakov Sučić (Volosko), Frane Letiš (Opatija) i Vicko Palmić (Lovran). Uz ovi člani posade ki su »zapisali svoja imena va povijest«, va ekspedicije su bili i Heinrich von Littrov i Johann Nepomuk grof Wilczek, judi ki su voleli Opatiju.
Kako je bilo va toj pomorskoj avanture od 1872. do 1874. leta, a govori se da je se skupa duralo okole 800 dan, najprvo se je moglo saznat na prvoj izložbe ka je parićana va vološćansken kafiće Kon-Tiki i bila je, kako je posvedočil Urban, »izložba za dušu i za domaći judi«. Tu se je moglo videt sliki od teh hrabreh mornari z Voloskega, Opatije i Lovrana, od teh judi keh magari je oprema va ono vreme bila slaba, ni bilo strah poć na more i svojen iskustvon i vojun pripomoć da se otkriju tajni sjevera ke se va to vreme nisu znale.
......