Gren va Brseč. Grad mi se brže nasprotu teče. Raširil je ruki, zima me naručaj kot svojni kad san prvi put va njega prihajala. Jas, njemu nepoznata učitelica, on mane nepoznat grad. Z leti smo se spoznavali i zavoleli. Danaska se va njin ćutin kot doma. Nisan ni prišlić ni došlić. A bila san i jeno i drugo. Kad smo muž i jas, kot mlaji bračni i učitelski par, prišli va Brseč, judi su nas prijeli otprtega srca i od onda v naručaj nosimo i si judi i vas grad. Sako toliko zbudimo spomeni, lih toliko da oćutimo kako smo potle sedan let šli ća bogateji za jeno velo breme jubavi i dva sina, ki su tu zgovorili prve domaće besedi.
Bil je agust 1965. leta. Bavica se od mora zdigala i mešala z vetrićen ki se spušćal z vrha Sisola. Kad su se pred gradon ti vetri trefili i zmešali dihi zelenila i slanega mora, lagje se dihalo i dan je šal daje svojen hodon. Vavek h večeru teplina popusti. Onda se oglase tići noćarići, a zvon crekvi sv. Jurja pozove na blagoslov. Glasi utihnu i spusti se blaženi mir.
A Brseč je odvavek bil i grad mira i grad jubavi. Zato nas tako i prezel. Nabrzo. I zavavek.
Va njin se vinovek sledić teže i sledić lagje živelo. Težje, aš se sakamo šlo hodeć. Ni bilo auti ni kurijer, a prej tega ni cesti, pa j' tovarić bil sveto blago ko sakamo more. I va grad i va bošku. A - lagje je bilo, aš su se judi mej sobun poznali, saki dan trefili i pogovorili, nikad karali i jeni drugen napomoć priskočili. Bilo j' više vremena pa j' i duša mogla plehutat. Oneh, ki su šli za delon i šoldon, prezel je grad. Moralo se trdo mučat i trpet. Va Brseče su ostali samo onisti ki su oteli na svojen preživet. Od malo kampanji. Lehi i lešice, miće, peskovite i skrbno obdelane. Za košić konpira, radića, fažola i boba. Na prezidah redi grozja za bačvicu vina. Opolne dve tri ribi za brodet i kus teple palenti. Ako ča prifali, našlo se pul susedi. Posudilo, vrnulo al dalo. Kako kada.
I sada, potle čuda let, opet stojin pred gradon. Jušto na onen meste kade se ferma kurijera, ka z Reki peja za Pulu. Ovdeka j' štacija na pol puta. Za odahnut. Kurijere, šoferu i putnikon. Svojni je tu bila oštarija Sisol.
Grad blešći okupan suncen. Otpiraju se prušijani. Pred gradon štandar mrvi beli oblačići. Spod njih proleti ki galeb, zdigne se visoko, visoko pa očijan nestane. Zelene ladonji, vele i visoke, pune friškega diha, mašu zduga. Pod njimi se svojni sedelo, povedalo, pravicu krojilo. Kako va ken grade aš ne rastu sakudar ladonji. Tako Mošćenice imaju veli kostanj, Kastafci lipu, a Lovran i Brseč ladonju. Va Lovrane je pod njun sedel i saski kralj Friedrich II. August kad se z Učki spustil va grad, a ki je se svojni sedel pod brsečkun ladonjun, ne znan. Bilo je to "sveto" mesto za ćakuli i za smeh. Tepal i srdačan.
| 
Opatija, Kumičićevi dani u hotelu Adriatic
|
Negdere opozime 1966. pod ladonjun je sedela kunpanija brsečkeh muži. Ženske, z decun va naručaje, stale su sledić daje i naslišale. A jeni i drugi za smeh parićani, otepali su ov put onu zmišjenu "mušku vodu" ka more se popravit, pa i od slabega storit krepkega muškardina. Na to Emil, direhtor draškega hotela Draga (današnji Mediteran) i štimani grajan od kega se niki ni nadel da tako neš reče, je rekal: A ča mislite da i mi naručimo jenu kašetu te vodi, aaa?! Si su ga pogledali i niš ne rekli, samo se s čista mira oglasila njigova žena: Aaaa, moj Emile, tebe ne bi pomoglo ni da se okupaš va njoj. Va smehe se okupal celi grad, ma va njin ni bilo ni sledić ruga. Ni sumji ni moglo bit, aš je Pepica naručaj nosila to leto rojenu Kseniju.
Oštariju Sisol držala je Eugenija Salković. Ni domaći, ni tuji nisu ju zvali po imene leh samo Jenica, a za dečinu ona je bila teta Jenica. I sada mi se pričinja da ju vidin onako krepku i fanjsku, kako va žmuji naleva vino. Nikad ni prodala skarsu meru, a fetice pršuta, tanke i jenake, na pijate su zgledale kot naslikane. Kako bi ki prišal nutra, zajeno bi dobil ča oteje. Jenica ni niš pitala, sen je vicije znala. Posebe mi j' kuntento povedala kako j' ime dobila po Eugene Kumičiće, kega su domaći zvali Jenijo, a i sam se tako potpiševal. Još je dožontal i Sisolski. Ki to ni znal, ona bi mu s prston pokazala tabelu na koj piše da se va ten meste rodil čovek od pera, Eugen Kumičić, hrvaski književnik.
Jušto tako štimala se i z imenon oštarije aš je Sisol breg znad Brseča. Da j' na njin bil nekad grad Gradac va ken su živele i vili, povedaju samo štorije. Jenu lepu doznala san od moje školanki Esteri Hrelja, a gre ovako: Bile su tri dobre vili. One su se igrale ka će daje hitit svoju strelicu. Bile su to Vila z Velebita, Vila z Osora i Vila sa Sisola. Najprej je Vila z Velebita nategnula svoj luk i pustila strel da leti. Strel je pala zada Sisola na istarsku stran i od poja storila Čepićko jezero. Onda je Vila z Osora pustila svoju strel. Strel je letela, letela, drito prema Sisolu i pala nablizu brega. Tamo kade je pala storila je Provartenica... Nikad nisan šla videt tu Provartenicu. A spravjali smo se čuda puti, ma vavek nan se zbersilo. Potle nan Dragić va razrede "stručno objasnil" da su otčepili Čepićko jezero, pa j' prišlo nazada poje. A nikad nisan doznala ni kamo j' pala ona treta strel, ku j' hitila Vila sa Sisola. Morda mi danas-jutra Estera dofini svoju štoriju?!
Za doznat više i od judi i od grada, treba vremena. Naslišat, čitat i iskat, pametit pogovori i ćakulat. Puno puti se čuje i ono ča čovek ne oteje. Najviše se, pak, navadi z decun. Oni se znaju. Oni su mi pokazali Pregrad, Presiku, Lokvu, Mandalenu, Šip, Pesak, cimiter, Lunčarovu šternu, Mašuneriju, toš, kuću gospodina plovana... I kuću va koj je bival Eugen Kumičić, po ken je i škola dobila ime. Va to je vreme, a je temu više od četrdeset let, Kumičićeva kuća bila zaprta. Se je va njoj bilo staro i nevajato. Nisu vajali ni krov, ni škalini, ni podi. Neš je pojilo vreme, neš brš, pa se nutra ni moglo. Jedino ča ni niki mogal rovinat, je lepa višta, rekli bi domaći, a to je otprt pogled na more se do Cresa i Veleh Vrat od česa čoveku zastane dah. Pred očijami modrina. Za lepa vremena vidi se kako putuje korenat, a za grda kako vali pene po stenah. Gradu, ki je 157 metar zgor mora, neverini niš ne moru. Jedino ribari moraju sled trje vezat barki na rive da njin more ne naškodi.
| 
Dragutin Tadijanović otvara Kumičićeve dane u Opatiji 1971. godine.
|
Pred Kumičićevu kuću navrnu si keh put nanese skroz Brseč. Tako su se tu rado fermali Dragutin i Jela Tadijanović kad su šli va Žminj, al z Žminja. Najprej bimo korak na korak šli do Jenijove kuće i sprotu povedali se neke štorije od pasaneh vremen. A kad bi prišli va kunpanije s Marinon i Inun Franičević, spomeni su se sami od sebe otpirali. Tadija i Marin bi načeli neku štoriju, pa ženske do besedi nisu mogle. Oni su dobro poznavali celu zagrebačku familiju Eugena Kumičića i znali su čuda više o njimi leh ča se va Brseče znalo. Kako još onputa va grade ni bilo ni telefona, a za mobiteli i kompjutori se ni ni znalo, saka j' novitad z velega grada va mići prihajala na retko.
Jedanput su Jela i Dragutin prišli neš raneje drito va školu. Školani su jušto šli doma i mogli smo na mire ćakulat. Opet su oteli prošetat do Kumičićeve kuće kot da je nikada nisu videli, a bili su pred njun baren desetak puti, samo ča jas znan. Ma šli smo. Pred kućun je Tadija stal i gledal more. Onako na lahko počel je povedat o Kumičiću, ki je, nažalost, živel samo 54 leta, a za samo dvajsetak let napisal je se. Va pogovore tiskanemu kompletu Kumičićeveh romani, kega je uredil, Tadija je to i napisal. Glavni urednik teh knjig je bil Vlatko Pavletić, a tiskala ih Matica hrvaska 1965. leta. Tadija je o temi knjigami rado govoril. A jušto tiste knjigi bile su prve ke smo kupili čin smo prišli va Brseč. Onputa san i prvi put čitala ča j' za Kumičićeve knjigi va izdanju Zore nekoliko let prej napisal Antun Barac. Ne poznavajuć ni Kumičića ni Barca nisan mogla ni sanjat da ću jedan dan upoznat njihi sini.
| 
Brseč nije imao gumno pa se ječam mlatom tukao pred brsečkom crkvom.
Fotografija iz 1962. godine.
|
štorijah keh smo raspredali hodeć do Jenice na pršut, Kumičića san zamišjala kot velega i krepkega čoveka ki brzo piše. Ne znan ako j' bilo tako. Morda i je aš mu je prva novela Slučaj tiskana va sušačkoj Slobodi 1879. leta, a samo dve leta kašneje i roman Olga i Lina. I to dva puta. Prvi put pod naslovon Olga i Liza, i bez potpisa, a drugi put s potpison Jenio Sisolski, a to leto tiskan je i Jelkin bosiljak. To ča se tiskalo na Sušake, govori da se Kumičić nikad ni odalečil od svojega kraja. Za oba romana Antun Barac je napisal: ... Kumičić se pojavljuje tek 1879. u 29. godini života, da onda god. 1881. Jelkinim bosiljkom doživi prvi uspjeh kod čitalaca, a Olgom i Linom izazove prvu senzaciju. U osamdesetim godinama, dok se još nisu istakli ni razvili Đalski, Novak i Kozarac, on je bio najplodniji i najpopularniji hrvatski pisac romana, pobuđujući svojim djelima i oduševljenje i otpor. Prije nego su Đalski i Novak počeli da gotovo svake godine izdaju po kakvu novu knjigu, Kumičić je hrvatske književnike i čitaoce kroz jedno desetljeće iznenađivao novim romanima ili većim brojem odužih pripovijesti: 1882. Neobični ljudi, Primorci; 1883. Začuđeni svatovi; 1884. Gospođa Sabina, Ubilo ga vino; 1885. Sirota; 1886. Pod puškom; 1889. Preko mora, Saveznice, Teodora; 1890. Otrovana srca, Sestre; 1891. Mladost-ludost, Obiteljska tajna; 1892. Urota Zrinsko-Frankopanska; 1896. Pobijeljeni grobovi; 1900. Petar Zrinski; 1902. Kraljica Lepa.
Va malo vremena čuda napisanega. Rekli bi judi: za dva živjenja dosta. Trebalo je zmislet, zaplest i rasplest su silu dogajanji i proučit more stareh spisi, baren oneh ki su mu rabili za zdavni pasano vreme. Za romani z domaćega ognjišća trebalo je samo prit va Brseč, prehodit umejki, spustit se do mora al sest na on svoj beli kamik, kega je priroda storila kot sedilo, pa ga i danaska zovu Kumičićev kamik. Povedal mi Mario Žitinić Cresanov, da j' Kumičić volel hodit do tega kamika, sest, gledat more i va jenu pisančicu na koleneh zapiševat. Z besedami je risal more, barki, škoji i Vela Vrata. Tako su nastali najlepji opisi mora keh je potle Kumičića malo ki va našoj književnoste dosegal. Na početke Začuđenih svatova Kumičić opišuje: Obala Lučice velebna je i tužna. Kad joj se diviš, sjedeć u lađici podalje od kraja, tvoje se oči ne raduju njenim grdnim klisurinama. Sive i oštre, te vrleti ne mogu ti srca razveseliti, razigrati, ni razblažiti. Kad ih gledaš kako se mirno u moru zrcale duša ti se smiri, srce zakuca laganije, slatka i tiha čuvstva stanu ti se slijevati u grudi, a oko tvoje spušta se za tim vrletima u bajne dubljine gdje se odsijeva plavetni nebeski svod, tako da ti se more prikazuje neizmjernim bezdanom, kao što je i nebo samo. Motreć one mrke grede i pećine kako se dulje i gube u beskrajnost pod tvojom crnom lađicom, misao ti roni sve dublje i dublje, dok ti se napokon prestravljena u duši ne zaustavi... Da me Mario Cresanov ni va barke zapejal pod Mandalenu i da na svoje oče nisan gledala Brseč z mora, nikad ne bin bila rekla da su Lučica i Brseč jeno. I da ni bilo Marija Cresanovega, morda nikad ne bin bila ni čula toliko štorij od Brseča. Z mora mi pokaževal one gole groti ke svire vajer, drite i bele, spečene i oprane od sunca i dažja. A tamo gore, gledajte va moj prst, tamo gore na samine, pul ona dva špikja, tu je mića zaravan i tu jako ne puše. Je jatno. Tu je sedela i prela Jelka. Ona Jelka z Jenijovega romana, ka j' na Mandalene čuvala ofce. Jedan dan je na tu ravan prišal neki žandarm i počel se vrtet i lastit okol Jelki. Znate ča j' otel. A ona se sirota stisnula h stene. Ma, kad se gospodinu shotelo neš više i počel ju potezat i natezat, ona ga j' odrinula sun forcun i on je pal preko one spikaste steni. Padal je drito va more. Za njin se po zrake vrtel klobuk, ki j' bil pun nekeh tičjeh peri pa se obrnjeval kot punčinela. Jenijo je to čuda puti naslišal pul ognjišća i potle va knjigu zapisal.
| 
Crkvica sv. Magdalene
|
I Jenio i Marijo voleli su stare štorije. Večer pul ognjišća. Teplo, oganj gori. Na škanjićeh sede stari mornari, ribari i težaki, a na škamblicah pletu al predu ženske. I to je mićemu Jeniju bila jedina televizija. Se ča mu rabilo našal je va svojoj dote. Va njigoveh romaneh prepoznali su se susedi i prijateli. Nekeh su se judi još dugo spamećevali.
Kad san već spomenula Sv. Mariju Mandalenu i Jenijov kamik, treba reć da su crekvicu, potle ča je čuda let propadala, obnovili i uredili, a 25. žetvenjaka 2009. va njoj je storena i maša ku je mašil velečasni Marijan Galović, brsečki plovan. Pred crekvicun je bila fešta i sad su si jako kuntenti. Više njoj ni nevreme ni dažji nete naškodit. Ta crekvica na vrh brežića odvavek je bila prvi senjal Brseča. Čin ju se ugledal, znaš da treba storit još samo dva tri zavitki do grada. Brseč ima i velu crekav sv. Jurja. A zaštitnik mesta je sv. Aurelije, kada se va pomajiće stori fešta s tancon va Pregrade. Va grade je još i mića crekav sv. Križa, a zvan grada na cimitere crekav sv. Stjepana. Pul vele crekvi j' zvonik, na zvonike ura, a se okolo kuće, nagnjene jena na drugu kot da su takane. Zidane su svojni tako da se prišpara jedan zid i sledić mesta. Bilo j' ceneje nagnut kuću na susedovu i ozidat samo tri zidi, nego delat sponova si četiri, al zmej dve kuće puntat tretu.
Kuća do kuće. Pred njimi je uski pašaj. Zdolun i zgorun. Škalini al volti, kako kade. Kot da bi na priliku, najprej je Martinčićeva kuća, pa Lišova, Cresanova, Tinjančeva al Katinova, Matičeva... I već si pred školun. Mića i lepa školica čepnula va sred grada. Ozidana na dva poda aš je i dečine nekada bil pun grad. Komać su nutra stale klupi za seh.
Danaska j' va škole samo devet školani. Sako leto ki manje, a meštrica – moja nekadajna školanka Sonja Škalamera. I ona va škole čuva celu bogatiju kot ča smo to delali i mi. Va mićen muzeje je stareh pijati, kikaric, lončić, zdelic, terini, rakaljskeh lonci, pluceri, pipi, lampadin, muzlic, ur, vreteni, preslic... i jedan "ćup" od zemji, lepega grlića, kega j' škole regalal Miro Galović, letričar sa Zagore. S ten vrčon gre i štorija. To van je znate, meštrica, jako staro. Va njin su Kumičićevi držali vodu za pit. Ki ga je i kada dal mojmu ocu, ne znan, ma ja van ga davan za školu aš san videl da čuda tega imate, rekal nan je kad smo ga prišli obać aš nan njigova Marina povedela da j' ćaća neš bolan.
| 
Đuro Kumičić, sin Eugena Kumičića
|
Pred školun z morske strani je komunska šterna ka ima dva grla od kamika. Školske i komunske. Niki ne pita čigove su aš vodu zima saki kemu rabi. Brseč je se do preklane bil prez vodovoda. Retki su imeli šternu pa su ove dve služile sen, a za školani je bil stavan hidrofor. Pod šternun je loža. Nekad se tuda šlo va grad. Povedal nan Doro Peršić da su vela vrata na boke imela i jena mića skroz ka su judi hodili nutar, a oba, i vela i mića, zapirala su se saku večer potle Zdravomarije. Kad su vrata zamejena, poveda Doro, hićena su dole i zakopana četiri metri duboko da nikad više niki grad ne zapre. Jedino da j' ostal jedan veli kjuč, ki je va školskoj zbirke. Ki ga prnesal, ne domislin se. I ne znan je va štorije ka mrvica istini, ma lepo ju j' bilo čut.
Pred temi vrati je Pregrad. Prelepo mesto za igru, za tanac, za prošetat, za va hlad se posest... Zgleda kot fortica. Na rube ograda, spod nje groti. Se jena drugoj va krile sede. Vaje do mora. Tu i tamo sledić zelenila skriva gol kamik. A tuda se do mora hodeć ne more. Samo z barkun. Odzgora čuješ kako more srče pod stenami. Avelino Valčić, naš barba Velo, ki j' bival va kućice zgor same Pregradi, a to je svojni bilo zvan grada, došetal je do ogradi i pokaževal mi: Vište tamo dole, na onemi stenami je ona grda nevera razbila barku od ke piše naš Jenio. Ja, ja, va knjige Začuđeni svatovi. Četiri su bili na barke, trih su spasili. O temu se nekada nadugo i naširoko povedalo. Pa j' to Jenio naslišal i zapametil. Brseč je bil njigova prva zibel. I to tu dole van je Sadrišće i va romane i zaspraven. Mi znamo da Jenijo Brseč zove Lučica, a Šip Šipak. Ma, ako greste čitat, se van je napisano jušto kako zgleda... Potle san poiskala taj del va knjige: Sav se već gradić uznemirio, vrata se otvarala, ljudi zazivali, sakupljali se i trčali, noseći duge konope na visoke klisure što se koče nad malom dražicom Sadrišćem. Ta dražica, ta uvala širi se nešto južno od mjesta Lučice, velika je kao kakva okrugla dvorana, a otvorena je baš prema buri, sjeveroistočnjaku, tako da prima ravno valove koji dolaze u nju tim vjetrom. Sa tri strane dražice dižu se vrleti okomito iz mora. Klisurine po njenim bokovima više su od grdne, nad morem izbočene pećine štono stoji u sredini.
| 
Sjećanje prof. Ivana Ivančića na Eugena Kumičića
|
Sto let je pasalo i niš se ni promenilo. Opisano mesto takovo je i danas. Jedino se promenila moja slikica od romana. Kad san kot školanka čitala Začuđene svatove, pred očijami san imela samo Preluk i kavu va koj se kamene kavalo pa san zamišjala jenu velu propadinu va koj se barka razbila. A sada mi pred očijami leži mirno more i modro Sadrišće...
Pregrad je blaženo mesto za dečje igri. Va škuren tu i kakov bušić pade. Va Pregrade smo opozime 1971. leta od 29. do 31. otobra storili jenu drugačiju priredbu. Nazvali smo ju Kumičićevi dani. Durala je dva dni v Opatije, treti va Pregrade i škole, a parićala ju Katedra Čakavskega sabora z Opatije. Va Katedre je bilo i Opatijac i Brsečan. Učitelica – prva presednica, tajnica Opatijka Marija Trinajstić, a dela su se još ćapali Ljiljana Peršić Dorotova i moj muž, a čuda je pomogal i Zvane Črnja. Imel je puno voji, jubavi i znanja pa smo se š njim ćutili jači. Prvi put da se o Brsečanu govorilo i va Brseče. Za tu zgodu akademski kipar Ljubo de Karina storil je od žesa bistu Eugena Kumičića, ku smo potle čuda let držali va razrede, a va Pregrade na prestave govorili su pjesniki svoji versi, školani čitali svoje štorije, a domaći ribari nalovili pol barki rib od keh je Brsečan Lucijano Žitinić va vile Rubin va Mošćeničkoj Drage skuhal brodet i jedan veli blok palenti za seh ki su prišli poštimat Kumičića.
Mej dosta judi od struki i pera bil je i Đuro Kumičić. Ćaća Eugen i mat Marija zvali su ga Jurica. I si Brsečani su ga zvali Jurica. Jurica semo, Jurica tamo, zvali su ga aš su mu oteli se pokazat. Danaska mi j' žal ča ga nisan više spićevala od familije. Mislela san bit će vremena. A ni ga bilo. Ostalo mi samo nekoliko slikic za spomen. Još i sada kad zažmen, vidin ga kako zabjeno stoji pred Jubićevun bistun od oca i sako toliko ju pogladi po obrazeh. Samo ča ni zaplakal. Po ten san znala da j' Jubić storil dobro delo.
Kumičićevi dani su finili, va novinah je bilo fanj napisi. Si smo bili mladi pa smo se i s ten štimali, a onda se malo po malo se pozabilo. Kot da ni nikada niš bilo. Hrvatski tjednik je još va prosince celu stranicu dal Kumičiću o kemu j' pisal akademik Dubravko Jelčić. Pod naslovon Razotkriti sve što je u Hrvatskoj trulo, Jelčić govori o pisanju Šenoe i Kumičića pa spominje i Kumičićev put va Francusku, kade j' upoznal Emila Zolu i naturalizam od kega je potle nastal magar sledić stavit i va svojo pisanje. No, Kumičićeva književna pojava nije ovdje povezana s godinom Šenoine smrti samo zbog slučajne vremenske koincidencije... Kumičićev književni rad, njegovo književno djelo, čak i književne intencije njegove, prirodno se nadovezuju na djelo Šenoino, na ono što je Šenoa ostvario, i još više, na ono što je želio ostvariti u hrvatskoj književnosti... piše Jelčić. Znači da je na Šenoinoj dote rasal Kumičić, a poznanstvo sa Zolun ga samo dodelalo. I tako je va našu književnost unesal neš novega i samo svojega, al kako j' to rekal Jelčić, zet ću mu besedi neka mi ne zameri, nije donio naturalizam, nego istinu, koju je zagovarao i August Šenoa.
| 
Ovako je Emil Barković prikazao Kumičićevu i sve druge brsečke obitelji.
|
Ono ča j' Kumičiću bilo od velega valora – su čitatelji. A njih je vavek imel. Za njih je pisal, ma ča potle struka govorila. Kumičić je bil čovek, ki j' volel povedat i pisat o sakidajnemu čoveku ki more tuče, voli težaki i ribari, slavi more, Učku, Kvarner... Ushićivao se pogledom na sela, razbacana po istočnoj obali Istre. Osjećao je nijanse u bojama mora i svjetla, u treptajima vjetra i zraka u svome kraju..., napisal je Barac. Rekal je ono ča misli saki Brsečan, ki j' pročital više al manje Jenijoveh knjih. I Barac i Kumičić va dubine svoje duši bili su pjesnici, ma to je već jena druga štorija. O Kumičiću su i prej i potle pisala naša poznata imena. Saki je rekal neš novega. I hvala njin, magar još čuda tega ni rečeno. Kumičić je bil zrcalo jenega vremena.
Pred nekoliko let pogovor za Besedu opet me otpejal va Brseč. Ov put h Emilu Barkoviću Batištovemu. Ko leto prej Emil je šal va penziju. Kako je pred njin bila duga zima, trebalo je neš zmislet za delat i zabavit se. I počel je iskat koreni svojoj familije. Veselil se kot otrok kad je otkril svoji nonići i prekononići, pa j' šal još nekoliko kolen ponazad. Odjedanput su mu se koreni zamrežali sa semi susedi, a njega j' mutilo otkrit to nekadajno veževanje muškeh i ženskeh člani sake familije. Tako je delajuć jenu po jenu kuću storil ono ča va struke judi zovu stablo života za se brsečke familije.
Mej njimi je bila i familija Šabarićeveh, kako su nekada zvali Kumičićeveh. Niki više z oven prezimenon ne živeje va Brseče. Gledan to velo delo, nemerjivo je, a Emil mi strpjivo i pomalo povedal: Čuda stareh sused san poznal kad san ja još bil mal. A bil san i kurijož za videt ki se za kega ženil. Zel san knjigi od našega plovana i počel slagat. Šal san od suseda do suseda. Kad san finil stablo života za 51 brsečku familiju, storil san i za 27 z Martini, 59 z Golovika, 47 z Svete Jeleni i 50 od Zagora. Se skupa 234 familije. Morda je, potle našega pogovora, storil još ku, aš va Brsešćine je odvavek bilo više familij lego kuć. Mane je škakjalo pitanje kade j' našal sa ta imena i leta kad se ki rodil, ženil i umrl? A on mi rekal kako misli da je dobro porabil nekoliko zim, kad se vane niš ne more delat. Emil je odvavek bil vredan. I kurijož. A ni znanja mu ni falelo. Finil je prvi stupanj Više ugostiteljsko-turističke škole v Opatije. Kad se dogovoril s velečasnen Toneton da složi i uredi četire crkvene knjigi, Emil je va njih našal pol onega ča mu j' trebalo, a po ono ča j' falelo, šal je v Reku va Arhiv. I tako je delo hodilo daje samo od sebe. Redali su se poznati i nepoznati, bližji i daji susedi.
Na hartu je stavna i Kumičićeva familija ku su zvali Šabarićevi. Kuća je nosila broj 23. Danaska kuća ima broj 30 i va njoj je Udruga Jenio Sisolski. Ona organizira priredbi i izložbi i vavek se va njoj neš dogaja, pa više niš ne propada. Prej leh rečemo ku od familije, dobro je znat za dve stare užanci. Prvo: vavek je najstareji sin dobival ime po oce, a drugo: ime umrlega otroka davalo se drugemu otroku. Tako je bilo i va familije Kumičić, pa se spominje pet Tomi al Tomaži po keh se loza nastavjala, a od dece dve Vincence i dva Andreta. No, kako je s puno strpjenja se to na hartu stavil Emil Barković, bit će vela škoda ako se to jedan dan ne tiska. A sada, ovako zgleda va škatulice posložena Kumičićeva familija skoro tristo let ponazad.
| 
Marin Franičević, supruga Ina i Vjekoslav Cvrlje u društvu brsečke učiteljice pred Kumičićevom rodnom kućom
|
Kumičić Toma I. i žena Margarita roditelji su Tomažu II., ki j' rojen 1737. Oženil se za Mariju Valčić, rojenu 1740. Njihov sin Tomažo III. rojen je 1774. i bil je potle brsečki dožupan. Oženil je Mariju Franković, rojenu 1780. s kuće Franković, i imeli su pet dece: Mariju, Tomu IV. Andreta, Antoniju i Antoniju. Kumičić Toma IV. rojen je 1804., a oženil je Mariju Filipaš, Purgarovu, ka j' bila rojena 1807. leta, i oni su imeli deset dece: Vincencu (1831.- ?), Julijanu (1833.-1913.), Vincenzu (1835.-1918.), Tomu V.(1837.-1903.), Andreta (1840.-1840.), Antoniju (1841.-1929.), Andreta (1844.-1849.), Josipa (1845.-1845.), Mariju (1846.-1850.) i Eugena (1850.-1904.).
Od deset dece samo je jedan - i to Tomažo V. - nastavil lozu va Brseče. Prodali su staru Šabarićevu kuću i kupili Kaštel od grofa Montecuccoli. Jedan del Kaštela su zrušili i predelali ga da bi se tu storila kuća za familiju. A onaj del stareh zidin, ki j' ostal cel i netaknjen, rabil se za skladište. Taj se del i danaska zove kašća. Taj Tomažo V. dva put se ženil, ma dečine ni imel, pa j' zel h sebe kot reduju neputu (nećakinju), hćer od sestri Julijani, ka se zvala Marija Franković. Marija se potle oženila za Petra Frankovića s familije Mihini i ostala bivat va Kaštele. Muž od Julijani je bil Ivan Franković s familije Štrambić i bil je kapitan i sindako (župan) Brseča. Drugi muški potomak Eugen Kumičić oženil je Mariju Maršić i živel je va Zagrebe. Kako su ženska deca ženidbun promenila prezimena, prezime Kumičić je nestalo z Brseča, a nastavilo se preko Tomice i Jurice va Zagrebe. Pravo za reć, bila su to teška i mušna vremena. Dugo, dobro i srećno živjenje imeli su: Julijana i Ivan Franković Štrambić, Vincenza i Ivan Valčić, Toma V. i dve ženi, (za ke Emil ni našal podatak va knjigah, a po pisanju prof. Ivana Ivančića - druga je žena bila Amalija Ljubica Bošnjak), Antonija i Juraj Galović Županić i Eugen sa svojun Marijun.
Dugo već va Brseče ni živeh judi ki su Kumičića za živjenja poznali. Si se domišjaju samo štorij. Jedan od zadnjeh ki ga j' poznal bil je profesor Ivan Ivančić. Užal je prihajat va Brseč pa smo više puti povedali od pasaneh vremen aš je profesor volel govorit, a volel je i da ga se nasliša. Tako je za Kumičićevi dani 1971. napisal svoji spomeni na vreme kako su Kumičić i Ivančić prišli va rod i potle se dobro poznavali. Kad smo se leto kašneje videli va Dome za umirovljenike na Kantride, dal mi je te svoje napisane uspomeni. Imel je već više od devedeset i tri leta, bil vremešan, a još vavek na soj pamete, pa mi je davajuć te harti ovako rekal: Na van ov moj referat, da ni "slučajno ne pozabite" na našega Kumičića. Od onda je pasalo skoro četrdeset let. I nisan pozabila, profesore. Ni njega, ni Vas. Profesorov "referat" ostal mi za spomen. Prof. Ivančić ga nazval Ličnost Eugena Kumičića, nekoliko podataka o tome iz moga sjećanja, a ja ga lih prepišujen:
| 
Eugen Kumičić
|
Od prilično malenog broja danas živih školovanih ljudi i rođenih na području današnje opatijske općine, koji bi znali reći iz svoga sjećanja i osobnog kontakta nešto o hrvatskom književniku iz Istre Eugenu Kumičiću (Jeniju Sisolskom), mogu se pohvaliti da se nalazim i ja koji sam ga poznavao kroz 14 godina (od 1890. do 1904.) i s njim sam više puta dolazio osobno u kontakt kroz 7 posljednjih godina njegova života.
Sretnim se smatram što to mogu reći danas u devedeset i drugoj godini svoga života.
Naša Istra je hrvatskoj javnosti dala nešto veći broj političkih i kulturnih radnika od kojih se ja sjećam iz osobnog kontakta nekolicine njih, od Dinka Vitezića, Spinčića, Mandića i Laginje do onih koji su nas posljednji ostavili, Ivana Pošćića, Franje Brnčića, Đure Červara i Ante Mandića. Ali od književnika Istra je od onih starijih, ranijih, godina i generacija dala relativno maleni broj, tekar desetak njih.
Od tih hrvatskih književnika iz onih starijih generacija trojica njih: Eugen Kumičić, Rikard Katalinić Jeretov i Viktor Car Emin, rođena na području današnje opatijske općine, imala su za života prilično jakog utjecaja na sve nas, školovane ljude, a bilo nas je nekoliko, sa područja bivše brsečko-mošćeničke općine. Ta Eugen Kumičić je rođen u samom gradiću Brseču, Rikard Katalinić Jeretov, rođen u Voloskom, imao je majku iz Mošćeničke Drage, a Viktor Car Emin je rođen u Kraju, malenom selu nedaleko Mošćeničke Drage (oko 2 km udaljenom od nje), moga rodnog mjesta...
Imao sam sreću, i mogu se pohvaliti da sam za svoga života, a naročito ranijih svojih godina, vrlo često dolazio u doticaj, i prijateljski bio povezan, s Katalinićem i Carem, naročito dok sam bio član ravnateljstva školskog društva Družbe sv. Ćirila i Metoda, a dok su njih dvojica bili službenici (namještenici) te ustanove, Katalinić kao blagajnik, a Car kao dugogodišnji tajnik.
S književnikom Eugenom Kumičićem sam se jednom sastao u samom Brseču, u stanu tamošnjeg ondašnjeg župnika Rajmunda Jelušića prigodom proslave njegova rođendana u kolovozu god. 1892. Od toga prvog sastanka s njim prošlo je nekoliko godina a da se nisam više s njim negdje niti vidio.
| 
Jurica Đuro Kumičić u društvu Ljiljane Jerkić i Cvjetane Miletić u Brseču 1971. godine
|
No, dogodilo se u međuvremenu da sam ja upoznao u Mošćenicama mladu djevojku, koja je u vrijeme velikih ljetnih školskih praznika došla iz Kanfanara, gdje joj je otac bio učitelj na ondašnjoj pučkoj (osnovnoj) školi. To je bila šesnaestogodišnja Gizela Vales, koja je došla k svojem djedu i k svojoj baki da zamjeni svoju tetku Ljubicu (Amaliju), po majci, na položaju upraviteljice Pošte u Mošćenicama. Ta njezina tetka imala se udati za Tomu (Tomaža) Kumičića, brata našeg književnika Eugena. Vjenčanje je uslijedilo već slijedeće godine 1897. i ta Ljubica Bošnjak se preselila iz Mošćenica u Brseč, odmah nakon vjenčanja, u kuću obitelji Kumičić, a spomenuta djevojka, njezina nećakinja, postala je kasnije moja životna drugarica kroz punih 45 godina. Preko nje i njezine tetke Ljubice udate Kumičić ja sam često imao prilike da dođem u doticaj (kontakt) i sa samim književnikom Eugenom i sa njegovom porodicom, napose suprugom Marijom i s dvjema njihovim sinovima: Tomicom i Juricom, kako su ih u djetinjstvu i mladenačkoj dobi u krugu obitelji nazivali.
U toku, dakle, tih sedam godina, od 1897. pa do 1904., u kojoj nas je književnik Kumičić napustio, imao sam više puta prilike da se s njim vidim, s njim razgovaram i u njegovoj blizini boravim. Koliko se sjećam posljednji put je to bilo u proljeću god. 1904. samo nekoliko mjeseci prije njegove smrti, bio sam u njegovoj blizini i u krugu njegovih najbližih rođaka u Rijeci, dok se je tako zadržao na povratku iz Dalmacije, mislim s otoka Hvara, gdje je bio nekoliko tjedana na odmoru i oporavku. Sjećam se da sam u društvu s njim i ručao u restoranu bivšeg hotela "Lojd".
Po mojemu sjećanju i po mojemu sudu bio je naš slavni književnik Eugen Kumičić kao čovjek, po svome držanju i obličju, čvrstog i muževnog stava i držanja, a krasila su mu lice dva bistra oka, jaki crni brkovi i tamne obrve. Bio je, dakle, ako smijem da tako rečem, pravi snažni Brsečan ili Brsečanin, kako se je sam nazivao i tako potpisao prigodom objelodanjanja jednog od prvih književnih svojih djela, pripovijesti "Slučaj", god. 1879. (godine moga rođenja) u političkom listu "Sloboda" u Sušaku kraj Rijeke.
| 
Emil Barković (drugi slijeva) u društvu prijatelja
|
Međutim, iako je naoko, prema tome, izgledao kao čovjek strogog držanja, on je u saobraćaju s ljudima, s kojima je dolazio u doticaj, naročito sa svojim voljenim rođacima u Brseču i njegovoj okolici, na Bršešćini, bio veoma blage naravi, mio i ljubezan, kao i sa svojim ukućanima, voljenom suprugom i dragim im sinovima. Zato nije nimalo čudno da su njegovi rođaci k njemu dolazili, rado i često, za vrijeme njegova boravka u rodnom mu Brseču.
Imao sam sreću te sam u raznim zgodama i ja mogao biti ponešto duže vremena u njegovoj blizini i promatrati ga kako živo i oduševljeno govori, i uživao sam kad sam ga slušao dok je držao zdravicu svome pobratimu župniku Jelušiću. Biranim se riječima služio pritom, a jezik mu je bio osobito skladan i lijep, pa sam uspoređivao njegov način biranja riječi i izraza pri takvoj zgodi s onim krasnim njegovim opisima poznatih mi morskih uvala, draga i lučica, uz obalu moje Mošćenišćine i svoje Brsešćine, na Tatinovoj, va Ubokoj, na Jelenšćici, na Brestovoj, na Stupovoj itd.
Naročito sam ga kao student, sveučilištarac, koji kod slaviste na bečkom sveučilištu uz profesore, Nijemce, studira klasične jezike (grčki i latinski), i još sluša i predavanja našeg slavnog slaviste Jagića i njegova druga profesora Rešetara. Bilo mi je osobito milo i uživao sam kad sam iz ustiju toga prof. Rešetara, kod kojeg sam imao upisane satove naše hrvatsko-srpske književnosti i jezika, čuo lijepih pohvala o književnim djelima našeg književnika Kumičića. I on je naglašavao prekrasne opise prizora iz ljepota i hirovitosti našeg mora, a i jezika u tim njegovim djelima, osobito pripovijestima iz primorskog i istarskog života kao što su na primjer "Jelkin bosiljak", "Začuđeni svatovi", "Sirota", "Primorci".
Prisustvovao sam više puta u svojim mladenačkim godinama razgovorima i sastancima, na kojima je učestvovao i naš književnik Kumičić, pa sam opažao kako se je on pri takovim razgovorima i raspravama zagrijavao i oduševljavao. Bilo je to već u ono doba kad se je počeo jače baviti politikom kao nar. zastupnik na hrvatskom Saboru. Bio je žarki rodoljub i iz svake njegove riječi i svakog pokreta ruku, kao i pogleda, zapažalo se da je govorio iz duše i srca, kao što su to pokazivale i stranice iz njegovih historičkih romana, naročito "Urote", koju smo mi još gimnazijalci u godinama njenog izlaženja i raspačavanja (od 1892. do 1896.) pohlepno hvatali i čitali napunjajući se domoljubljem i mržnjom za brutalnost i smaknuće tobožnjih urotnika Petra Zrinskog i Frana Krste Frankopana.
Uvjeren sam da su se mnogi naši ondašnji omladinci na književnim djelima Eugena Kumičića, a u prvom redu iz radova naših Istrana, napajali rodoljubljem, a i zagrijavali za ljepote naših istarskih primorskih krajeva, čitajući spomenute njegove pripovijesti i romane iz tih krajeva, kao i historičkih romana: "Urote" i "Kraljice Lepe". Iz toga i po tome se vidi kakva je ličnost mogao biti naš književnik Eugen Kumičić.
Kako je pisal, tako je i povedal prof. Ivan Ivančić, pa ga čovek mogal ure i ure naslišat.
Samo kad smo mladi retko imamo vremena i strpjenja.
Na kraje ove štorije pred manun je još jedan vijaj. Moran poć h Ivanke Turković va Lovran. Ona čuva Novu zagrebačku kuharicu, ku j' napisala Marija Kumičić. Kuharicu spominje i Igor Mandić va svojoj knjige Sebi pod kožu i leta 1888. i 1891. po čen bi se reklo da j' Kuharica imela dva izdanja, i to još za života Eugena Kumičića. A gospa Ivanka čuva četrto izdanje, ča govori i neš više. Skupa smo prehićevale stranice i iskale je Marija, kot brsečka nevesta, stavila va libar baren jedan brsečki ricet. Naslov nan govoril da su nutreh zagrebačka jida, ma nikad se ne zna. Zato smo bile kuntente kad smo našle riceti kako se parićuje kisela repa i kiseli kapuz, al broskvi za Viliju Božju. Zapisala je i kako se parićuje kuhana i frigana morska riba, i kako se delaju brodet i marinada. A nutreh se našla, bome, i palenta...
Nova zagrebačka kuharica ni jedino ča j' ostalo za Marijun Kumičić. Pisala j' ona i pjesmi. Bila je pametna, školovana i politički napredna ženska, pa će se o njoj još fanj tega doznat, treba samo razgrnut škurinu. Marija Maršić, rojena je va Varaždine 1863. leta. Za Kumičića se oženila 29. 9. 1882. Skupa su proživeli 22 leta i odgojili dva fantini. Kad je Eugen umrl, Marija je imela samo 41 leto i pred njun je bilo još jušto toliko let živjenja. Umrla je va 1945. va 82. lete, a sini su va Zagrebe nastavili lozu.