Kad već zima popušćeva i mladi pupi zadiše, a tu i tamo slavuj zakanta, toj znak da dohaka proleći. Morda jušto zato va tom najlipjen dobu od leta dočekujemo veli blagdan Vazam.
Domišljan se na sada već pozabjene užance okolo VAzma ke su bile štimane med našimi judi. Već put se misli da su te stare navade primorskog kraja malo važne i da se od vrimena na vrime užuju zmed manjin krugon judih, da se jušto po sensega ne zaru, tr' to j' morda i najveća istina. Kroz pasano vrime doživelo se j' čuda promin okolo našega okruga, naše zemlje, pa još šire i Evrope. Sakako daj' tomu doprinesla »industrijalizacija« i »urbanizacija«, a se to pomišalo j' i »demografsku« sliku našega primorskog kraja.
No, bilo kako bilo, kroz vrime sej' vavik našlo onih ki su oteli zapisat i povidet se to, da se dota od užanc i besed ne zatare. Oni su ju nan pušćevali, mi ju pušćujmo našin, a našli neka ju pak pušćuju svojin. Aš su stariji judi užali reć: Boje da se zatare selo, leh užance.
Po celon grobničkon kraju okoli crikvenih blagdanih bile su slične užance. Kad su finile maškarane, mesopusne nimotarije ke duraju do Čiste srede, počinjala j' korizma. Na Čistu sredu ili Pepelnicu, hodilo sej' k' maši, na kraj naše plovan bi sakoga čovika posipal s popelom po glavi. To bi značilo čišćenje i poniznost va korizmenon vrimenu ko dohaja. Od tuda i besede: "Spomeni se čoviče da si od popela i da ćeš se va popel storit." Od Pepelnice do Vazme je četrdeset dan, tih četrdeset dan traje post i odricanje.