Štorija prva: Arivala je grupa starejeh, ma dobro držećeh Ingleži v' Opatiju. Lepo vreme, dažja ni za lek, a okole se zeleno. Maj diši, rožice seh kolori cvatu, Ingleži uživaju aš njin lumbreli ne rabe. Čuli su da j' lepo va Hrvackoj i da j' Opatija jušto ono ča rabi juden kada pridu va neka malo zreleja leta – krajica turizma va koj se dobro mogu zlečit boli srca, pluć, reumi i se neš ča ne vaja. Kada su se lepo smestili va jenen od mora hoteli, jedan je ot njih, neki Hugh ki j' volel škercat da je, magari bi mu mogal bit otac, ime dobil po glumce blizu kega biva, a zove se Hugh Grant, šal iskat jedan dobar hotel kega mu j' još prej rata va Hrvackoj preporučil prijatel. Tisti hotel da je »cool«, ča bi se po hrvacki moglo reć »mrak«, »strava«, a morda i »guba«, ča god da to značilo. Zaspraven da je tisto čudo »cool«, da tu odvajkada najraje prihajaju jušto Ingleži i da se v' Opatiju ne sme prit a da se ne zajde va hotel kemu j' ime Jadran. Lepo ime za hotel, razmišljal je Hugh dokle je šećal po Opatije i iskal to važno mesto za kega mu prijatela vežu lepi spomeni. Kad je se prepasal, anke i čuveni lungomare, glavnu ulicu, pa se do gornjeh kraji, ni se mogal načudit da tistega hotela po imene Jadran, baš kako plavo more va ken j' užival, ni pa ni. Počel se j' onako nadugo propićevat, aš mu ni bilo drago direhtno pitat ono ča ga muči. Ma, si mlaji keh je onako pol na ingleški, pol na hrvacki pital kade j'hotel Jadran, nisu se mogli domislet odgovora, a stareji ga neš nisu razumeli, a neš nisu dobro čuli i to je bil lepi kažin. Jedino mu j' jedan čovek srednjeh let lepo šjegal da takovega hotela v' Opatije ni, ma da ako sede na kurijeru na koj piše »32«, more nać hotel pod ten imene, ma v' Reke... Bil je već dobro dišperan i već je skoro prijatelu poslal mejl s čuda upitniki, kada mu j' na konce ljubazna recepcionerka špjegala da j' odgovor na njigovo pitanje dosti lak i da ćemu pokle dela sama pokazat mesto ko išće. I tako j'bilo – šinjor Hugh ki bi rada bil Grant i pohofiral mladu šinjoricu da mu je baren četrdeset let manje, prošećal se njoj uz bok i tako su malo po malo arivali do luksuznega, nedavno obnovjenega i renoviranega, čuda hvaljenega hotela Millennium. Jes, tu da j' pojil odličan kroasan, tu da se ne more pasat prez štrudela, al švarcald torti, ma još vavek da ne razume zaš ga j' pripejala baš na tisto mesto... I onput mu se j' upalila lampica – Millennium i Jadran, ale Jadran i Millennium su zaspraven isti hotel.
Nekadašnji hotel Jadran nedavno je dograđen i preimenovan u Millennium