Opatija nudi čuda lepoti. Sačigoven očijan. Samo rabi gledat, videt, prepoznat i uživat. Z jene strani vili i palaci, parki, hoteli i pozornica na otprten, z druge more, Lungomare i Slatina, Portić i Dražica, a tu su i dva mića, mića bisera, dva stara već pozabjena i neduperana perila. Sako za se, al oba skupa, spomenik su kemu vreme ni naškodilo.
Prvo je perilo va Dražice. Svojni je bilo storeno za se opatijske lavanderki. Na njega su prihajale i ženske od Pobri, i one z gornje cesti, a oniste ke su bivale na Križišćen štimale su se da su, kot da bi, sled više domaće. Se su one tu prale robu. Neke svoju, neke tuju. S tujun su i zaslužile ki šolad. Trebalo j' obastat. Familiju zdignut. Preživet. A dečine je bilo kako fažola, rekli bi Lovranci. Jena od njih, Marija Kantabelka, našla se i va verseh Dragota Gervaisa. Ona je i danaska spomen na se opatijske lavanderki ke nisu pustile da ih živjenje z mizerijun potare.
"Marija Kantabelka, / opatijska lavanderka, / je sedan dece imela, / zadnje već posivela..." Toliko dečine ne strže danaska po nijenen pute, a njoj je svojni za prehranit toliko ust rabilo delat od rana jutra. "Tuju je robu Marija prala, / lušjala i režentala, / i vavek tekla od kući do kući / kot već čovek ki za drugeh se muči." Va tu muku sakidajnu bilo j' pospravno so njijo živjenje. Saki je dan sedan lašneh ust čekalo partić kruha al fetu palenti. "Ma ova ista Marija je vavek kantala, / za niš se svijala i za trbuh držala, / kričala i smela kot ponemela.../ A kako bi brižna drugačje živela?"
Va muke njijega živjenja deca su rasla. Mlaji bi rekli da j' to bilo va pasano vreme. Je. Ma, ne toliko pasano da bi se posensega pozabilo. Neki se još domišjaju Dragotoveh opatijskeh kampijuni, mej kemi je bila i ovista Marija. Si su oni, saki na svoj mod, senjali ovaj grad. Ako vas, onako zarana, put nanese po Lungomare na Dražicu, va onoj maglice od jutra pričinit će van se da hrbat drica i Marija lavanderka. I fermajte se malo. Vredi ju ne pozabit! 
Opatija je nekada imela više peril. Oneh na Slatine i još nekeh drugeh je vreme pojilo. A perila su se vavek delala samo tamo kade j' bil zvir. Voda z Učki prihajala je kot potok nad zemjun al potok pod zemjun. Onaj zgora po lete bi presušil, onaj zdola nikad ni sunce popilo, pa j' vodi bilo za saku potrebu. Ako zvir finjuje va moren, zovemo ga vruja i od njega ni koristi. Zato više vredi i najmanji zvirić zvan mora aš ga se vavek moglo na dobro porabit. Storit škajku, buč, kal, perilo... ča j' već rabilo. Ž njega se vodu i doma nosilo. Najviše va brentah. A vodu se ni razlevalo, leh pomalo i šparno trošilo. Sejeno se perilo ni moglo sagdere storit. Moralo je imet, rekli bi danaska, dobru lokaciju. Da se do vodi lagje pride i da nablizu biva više judi... Na se neš se moralo gledat.
Va opatijsku Dražicu voda prihaja z Učki. Samo ime Dražica koristi se, prvo, za celu morsku valu va koj se i danaska zibju vezane barki. A svojni, dokle ni bilo kurijeri, va Dražice su pristajali i manji brodi, ki su pejali školani i delavci v Reku. Okolo Dražice ozidale su se kuće i palaci pa se i taj del mesta zove Dražica. A treta Dražica je sam zvir vodi. Taj zvir nikad ne presuši, a kako je skoro nasred mesta i sen nablizu, do njega su ozidani škalini, keh su pred sto let zvali Salita della sorgente. To bi na književnen zajike bilo Stubište izvora, a za domaćeh je se to skupa odvavek bilo samo Dražica.
Gospodišna Melinda Kostelac je va stareh hartah našla da se ov izvor prvi put spominje, i to na nemašken zajike, 5. rujna 1894. leta. Taj je dokumenat potpisal Emil v. Mayerslach, ki je namislel da bi se na Dražice storilo jeno velo spremište vodi, kot da bi neka vela šterna, va koj bi se čuvala voda za potrebu judi, blaga i ognja. To spremište vodi bi bilo pokriveno, ale tako da vodu moru zimat judi za svoje potrebi, a posebe da ju koriste opatijski pumpjeri. Misal je bila dobra i ne bi to bilo ni čuda guštalo, samo nekeh 2.000 forinti, ma se ni nikad maknulo daje od ideji. Namesto tega, muške su ruki kamiki sklesale pa se zvir kvadrato ozidal, a z boki se nakoso postavilo ploče od klesanega kamika tako da ženske lagje robu peru. I tako je Opatija namesto spremišta dobila perilo.
......