Druga polovica 80-eh leta pasanega stoljeća, jedan mići otročić ki vavek vekon hodi va Leprinac, do nonića i noni. Stara kuća sred starega grada, s ke mu je otac. Kuća više zgleda ko kaštel, a govore da je nastala na bedemeh starega grada Leprinca još va srednjen vijeke. Nona j' vavek govorila – stara j' preko 500 let. Nutre, va toj kamenoj kuće mej dve crekvice z nonotun i nonun biva i teta Anica, leprinaška mlekarica. Ostala je doma da pomore svojen staren i na kraje se nikada ni ženila. Težačka, pobožna famija ku su voleli si domaći judi aš bi nedeju pokle maši vrata za seh bila oprta. I ne samo po nedeje, vavek. Kuhalo se j kafe, a i ''te'', kako je teta Anica rekla za čaj. Našal bi se vavek kakov kus sira pa narezal, a spametin se i pršuti kako su dišeli dole va konobe. Na zide ura. Saku okruglu uru van z nje hodila j drvena kukavic. O polne i večer za Zdravomariju ona bi kantala, a zvon z crekvi držal ritam.
Nonić je partil na boji svet, a dve starice, ostale su same va kuće ka je nekad bila puna dece i judi. Par kokoš zdola kući, va štale jena koza i spomeni na vreme kada su i jena i druga hodile Opatiju nosit mleko za gospodu, pa onda oprtit koš i nazad zgorun.
Doma je bilo tendit oko blaga, parićevat i spravjat seno i tako su pasevali dani i leta. Već onda je to bil svet ki je pomalo nestajal, a danaska tega sveta više ni. Onemu mićemu otroku ki je upijal saki sekund ostali su dihi, zvuki i spomeni tega vremena kade je se bilo sporeje, ali mi se para da je hrana imela više gušta, judi više tepline i da je va živote bilo više života. Ono ča nikad nisan uspel otkrit bilo je – kamo je nona spravila one špekuli seh kolori ke san dobil za regal? Valda ju je bilo strah da ih taj jako živ otrok ne stavi v usta pa ih je skupa z jenen plastičnen lončićen od jogurta nekamo skrila.
Leto za leton je pasevalo i vaje vaje su se moje dve starice pobrale. Partile su na onaj Boji svet jena za drugun, va par meseci. I odjedanputa – ni više bilo kafa nedeju pokle maši, rakija z kimenon već ni dišela, a vrata ka su vavek vekon bila oprta za si judi dobre voji – zaprla su se skupa z drvenemi prošjanami. Rožice ke su rasle va stareh latah tužno su se obesile, a Katinićeva starina je stala sama. Prazna. Sred starega grada, mej dve crekvice, jušto kakova j' odvavek bila. Samo je sako leto brižna zgledala sve huje i huje.
Rasal je otročić, al Leprincu se j' vavek vrnjal. Vuklo je ''to neč'' zgoru, neč za ča morda ne postoji prava beseda, al najbliža temu bila bi – pripadnost. Tu su koreni, tu san doma. I neč te vuče da se vrnjaš, a ča greš stareji, to je se jače i jače.
Ono po čen san vavek znal da san prišal Leprinac je dih od zemji. Zemja črnica, ka zadiši zajno kad se poprtiš na brežić spred kući, a pokle dažja se oćuti najviše. Fragola ka je dozrenula pod starun brajdun zadiši najjače kad počnu prvi dažji i kad leto pomalo umire. Daž zipere stari skalini ki gredu drito na Brituh, a oblaki stira bura ka odzdola zapuše – i onda Kvarner držiš v ruke, najdraži kraj ti va dlane stoji. Pada noć, a pale se svetla grada, a tu gore, dva prsta do neba, mir po kega ćeš vavek va živote semo prihajat. I vavek je jena kluša stara na Brituhe bila stara prijatelica koj si se prišal potužit al pohvalit, i sedeć na njoj va ten mire tamo dole gledal kako se dogaja cirkus života. Tamo, gore, onda, kako da čuješ i ćutiš sni svojga oca, svojeh nonići i seh oneh puno prej tebe kako z vetrun okolo lete i čekaju da ih ti ćapaš.
...