Vazanj je ovistega leta bil 27. marča, a za Opatiju je tisti datum važan i zaradi jene žalosne štorije ka se j' na ta isti dan 1891. leta dogodila. Bilo j' to pred jušto 114 let...
Prehitimo se malo va to pasano vreme, aš dižgracija na more ku Opatija još vavek pameti, rodila je jenu od najpoznatejeh opatijskeh legendi. Pred 114 let, na 27. marča je bil Veli petak, a Opatija je va to vreme već bila jedan od najpoznatejeh centri turizma Austro-Ugarske i cele Europe. Gradili su se prvi hoteli, vila je bilo se više i više, pa je i zgradit kakovu lepu kuću uz more bilo pitanje prestiža ondašnjeh bogataši.
| 
Opatijska divojka z galebon, rad akademskog kipara Zvonka Cara z Crikvenice
|
Austrijska grofovska familija Kesselstatt je bila jedna od tisteh dobrostojećeh familij, pa su va centre Opatije sagradili vilu. Ma, va libre od opatijske turističke povijesti nisu nažalost ostali zapisani po njoj, lego po tragedije ka ih je zavila va črno. Pred vrateh je bil Vazanj, a Opatija puna kako šipak. Turizam je va to vreme već bil toliko procvetal, da je bil storen i projekt o razvoju opatijskega turizma (1847.), a 1855. je štanpan i prvi libar od opatijskega turizma, kega je napisal Albert Szemere. Od 1883. leta se počela pratit statistika turističkeh dolaski, započela je izgradnja lungomarea, a 1886. je va moren pred Opatijun, od mula prema Slatine, održana i prva regata va koj je bilo 15 barki.
Va takovoj, turističkoj i se modernejoj Opatije javjale su se i turističke ideje i želja za avanturizmon. Oni ki su zapisali ča se j' to dogodilo 27. marča 1891. leta govore da je vreme na Veli petak bilo vedro, ma mrzlo. Puhala je jaka bura i saki je ribar ale brodar znal da š njun ni ča škercat. Ma, nisu baš si tako misleli. Jutro se j' mladi grof Arthur Kesselstatt, ki je imel 24 leta, skupa z dobremi prijateli od familiji, groficun Anun Fries - Strahowitz i njijen 16 let staren sinon Jurajen Frieson, zaputil va mićoj barke va Volosko. Tamo su želeli poć va crekav i pripravit se za veli blagdan od crekvi, za Vazanj. Se je pasalo dobro, đir po more od Opatije do Voloskega je lepo finil i već zapolnen je ista kumpanija šećala opatijsken lungomaren.
Legenda govori da je grofica Fries počela govorit, da kako je more lepo, da kako je va njega zajubjena i kako bi va toj modroj dubine lahko mogla i mirno umret. Da bi baš i volela da njoj kraj bude takov. Počela je tentat sina Juraja i grofa Kesselstatta neka opeta gredu va barčicu na more. Bura je puhala, digali su se se veći vali, ma grofovsku kumpaniju to ni čuda šekalo. Muški su bili plemićke krvi, ma ipak muški, i tako nisu mogli dopustit da njin se ženska smeje i govori da su kukavice ako ne gredu na barku. Judi od mora su se za glavu ćapevali i molili jih da ne gredu va to nemirno more, ma ni bilo za korist. Tri kuražna, ma neiskusna srca su va mićoj barke pasali vanka spred opatijskega Portića i našli se med velemi vali. Veslači ki nisu imeli dosti iskustva, kada su videli da more ne škerca, oteli su brzo, čin prej poć nazad i vrnut se na obalu, ćapat opeta ono sigurno i lepo opatijsko tlo. Ma, već je bilo prekasno. Prišal je veli val i va sekunde prevrnul barčicu i seh ki su bili nutre.