Da bi se z Mošćeničke Dragi arivalo prit do Mošćenic, mora se pasat 753 škalini, al z auton jeno dva kilometra po ceste punoj zavijutak. Od Opatije su Mošćenice na nekeh četrnajst kilometar, pa si turisti ki pridu va najstareje hrvacko turističko mesto rada store i jedan vijaj do srednjovjekovnega gradića na 173 metar znad mora. Kada se pride zgorun, vidi se celi Kvarnerski zaljev i sa bogatija našega kraja ponudi se va svojoj lepote.
Z Mošćenic se more prit i do Učki ako se voli planinarit i va prirode hodit, a to je i mesto z kega se po staze more prit do stareh, napušteneh sel. Va libreh je zapisano da su na ovisten dele sjevernoistočne Istri nekada bivali Liburni, ilirsko pleme po ken se i ovisti del "lepe naše" uža zvat Liburnija. Magari su pred čuda let Mošćenice bile glavni grad va celoj susešćine, judi su se va noveje vreme kalali bliže moru i centar je postala Mošćenička Draga, ribarsko mesto ko se štima z turizmon, jako lepun plažun i z čuda bogovskeh restorani.
Va Mošćenicah danaska ne biva čuda stanovniki, ma sejeno, tisti je gradić ki se je zgradil na obronkeh Učki, zarad svoje bogate povijesti, mediteranske arhitekturi i čuda kulturneh i urbanističkeh spomenici zamerital jeno posebno mesto va srce sakega ki voli liburnijski kraji. Da bi se "zagreblo" z poplati va samu jezgru stareh Mošćenic, mora se pasat skroz gradska vrata i naslišat štorije i štorijice ke povedaju njije uske ulice, kale, škalini i kamene zidine. Povijest Mošćenic je bogata i čuda je libri va keh se more pročitat dosti tega od nekadajnega vremena, od crekav, kaštela, toša, muzeja, cimitera, vidikovca i se tako ponaprvo.
Ma, mi ćemo se malo fermat na noven vremene i lete 2003. kada je osnovana Katedra Čakavskega sabora Općine Mošćenička Draga, ka je počela delat sun forcun i počela rivat jedan veli projekt ki se zove Mošćenice - živi grad muzej. Još pred pet let ih je va tistemu projektu podržala i Općina Mošćenička Draga, a kako će va sakoj prilike reć vredni judi i predvodnici Katedri, Veseljko Velčić i Robert Mohović, kada se ono ča su zamisleli realizira i Mošćenice zaspraven postanu Živi grad muzej, to će bit jedan veli regal ne samo za znanost i kulturni turizam, lego i za si judi ki su ostali va Mošćenicah, kako i za celu Općinu Mošćenička Draga.
Čuda podatki od tega vrednega projekta tiskano je pasanega leta va petemu Mošćeničkemu zborniku, kega je uredil Robert Mohović. Pišu va tistemu zborniku judi od struki i judi ki vole Mošćenice, a jedan od najglasnejeh kada se poveda od projekta Živi grad muzej, sakako je jušto šinjor Veseljko Velčić, kemu je glavna misal spasit Mošćenice da ih ne rovina moderno vreme i da se da pravi valor kulturnoj, povijesnoj i graditeljskoj baštine tega mediteranskega bisera. Ale, kako je zapisal, da se zbudi uspavanu ljepoticu. Prvi i jako veli škalin je bil kada je osnovana Muzejska zbirka Mošćenice, i to 1984. leta i se do danaska ni prestala delat.
Kako bi se dobilo malo za projekt, va Mošćenicah se preko leta održavaju letnje školi graditeljskega nasljeđa keh organizira Katedra va suradnje s Arhitektonsken fakulteton Sveučilišta va Zagrebe. Tako je storeno arhitektonsko snimanje seh crekav, kulturneh i drugeh objekat i tako se došlo do znanstvene podlogi za proučavanje urbane cjelini srednjovjekovnega gradića. Kandalora, ale Svijećnica, va febrare mesece, drži se za Povijesni dan Mošćenic, a slavi se 2. febrara. Kada se ostvari se ča rabi da bi se Mošćenice zaspraven proglasile da su "živi grad muzej", judi od struki i dela govore da bi jušto Kandalora mogla bit pravo vreme za to. Va projekt Mošćenice - živi grad muzej pospravilo bi se se ono ča je va ovisten povijesnen gradiće dobro sačuvano, a more se prežentat ne samo domaćen juden, lego i turiston ki z leta va leto rada prihajaju. Tako će se tu nać ne samo mošćenička placa, crekva svetega Bartula i cimiter, kaštel i stražnica, lego i restoran Perun i gradska vrata. Va projekte će bit i župna crekva svetega Andrije, Crekva sv. Sebastijana, onput crekva sv. Roka i crekva Marije Božje od zdravja, kapela sv. Križa na Kalvarije i perilo, pa Muzejska etnografska zbirka Mošćenice, Zavod za kaznene znanosti Pravnega fakulteta v Reke, ošpital - hospicij i ubožnica, zvonik, kosnica, Milkina kuća, toš, Rudnićeva šterna, kapelanija, ma anke i "put okol grada" i još čuda drugega. Tako će se zadnjeh 1300 let naše bogatije, od glagoljice, čakavskega zajika i štorij od Slaveni na Liburnije i od boga Peruna, va glavneh rigah se ono ča smiron prežentuje i Katedra Čakavskega sabora Općine Mošćenička Draga, nastojat još boje iskoristit va turističke svrhi. Veruje se da bi realizacija ovistega ambicioznega projekta mogla obogatit turističku ponudu ne samo Mošćenic, lego i cele rivijeri.
