Opatija je na početke 2013. leta "razvila" jedan novi vid turizma – "bager turizam", a ki se je nastavil na kramp-štoriju z 2012. leta. Najme, kamo god da pogjedaš, videt ćeš neku "tešku mehanizaciju" i još k temu čuda delavcih. Raskopani kanali, zaprte cesti, semafori i čuda, čuda dobre voji i strpjenja za seh ki tuka bivaju, ale prihajaju v Opatiju! Aš da će pasat lišo – neće. Najme, čeka se na se strani, i to va veleh kolonah. Ma, kako se ono reče – strpjen – spašen. Ale – ki čeka-dočeka. Pokle čuda let stagnacije, prišlo je vreme od investicij. Najprvo ćemo reć dve tri od oneh ke su pobudile jako veli interes javnosti.
Ono ča je bila "turističko-investicijska" vijest broj jedan je to da je vlasnik restorana Bevanda Zoran Maržić va febraje započel jeno jako velo delo – restoran uz samo more će se pretvorit va vrhunski butik hotel. Va nove sviti će se obuć i kupalište Lido i Angiolina, storit će se nova šetnica, lučica za jahti spreda hotela... Uglavnon, ako se bude onako kako je najavil Maržić, Opatija će imet jenu novu vizuru i novu arhitekturu va svojen obalnen pojase. Projekt je vredan okole 3 milijuni euri.
Va drugoj štorije i na drugen gradilište, onen na Slatine dofinjuje se prva opatijska autogaraža va koj će se moć parkirat okole 350 auti. Najme, pronašal se je novi investitor, Nediljko Brko, vlasnik okolneh hoteli Galeb i Savoy, a ki je za 17,3 miljuni kun kupil nedofinjenu garažu i zajno ju počel dofinjevat, tako da će se va sezone rešit i jedan jako veli opatijski problem – manjak parkirneh mesti.
Treći je jako, jako veli projekt, a ki je sada i va samoj završnoj faze, Sportska dovrana Marino Cvetković na Lipovice. Uloženo je va tu štoriju 47 milijun kun, a kada se dofini, Opatija će imet i vrhunsku dvoranu za si svoji sportaši, a va isto vreme i multifunkcionalnu dvoranu va koj će se moć održavat i vele manifestaciji i spektakli kot ča su izbori za miss, Dora, Porin i druge takove "fešti za oko i uho", a ke se moraju održavat va velemi prostori, pa je i najstareji hotel Kvarner za njih postal premići.