SUŠAČKA REVIJA broj 105/106

 


naši ljudi

KROZ PAUČINU OD KOLTRINE

Vlasta Sušanj Kapićeva

(Ljubomiru Pavešiću na spomen za stotu letnjicu rojenja)

Živjenje mu je namenilo bit boem.

I otac od domaće radijske besedi.

 

Za bit liburnijski litrat od zvonećeh besed,

jagodice od lampadin

sȅ okolo Kvarnera, od spod Učki,

z Opatije, preko peril do Kirije.

 

Za bit va zasitnoj majkinoj besede,

mićihno se lulat i slatko va šake smokav.

za gledat na partence mamin črni rukav.

 

Za obnoć bit bolan i škuro tužan,

za obdan mej judi pobeljen marćat, velik i drit,

z veseljen, va mužiku i piski živjenski namoran,

sledon vražikoveha nãsmeha,

malo dobrega, malo zločestega

spod črnega brka, nad tekućen zlaton žmuja.

 

Adio, boema,

boh Jubić!

 

Platit je suzun saki svoj korak!

 

Pustit oku suzu za past

va poklone,

va poklone.
 

 Tȁko san rekla kad san se poklonila bardu od domaćeh besed.

 Ovȁko je pak Ljubo videl samega sebe 1975. leta kad mu je štampana prva samostalna čakavska zbirka pjesan „ Mamina starina“.

Po bure, ka hita grmi dole, 28. jenara 1919., Ljubo se j' rodil va Škrljeven, selu va okolice Rike. Nekuliko dan kasneje majka Kata ga pofašanoga – kot da nosi fagot – ponesla krstit. Povedaju da se malčić plakal više na vodu leh na sol.

 A ja ga čujen i sad kako se smeje spod brka:

Na vodu, na vodu, aš ni va postole ni dobra!

I s temi besedami napisal boemsku autobiografiju.

Sto je let pasalo od tega ledenega jenara. Pak ni zimi više nisu kako ča su bile. Fine prej nego ni počnu! Jedino ča je va grade na Rečine smoga se ča daje više. A morda to nekadajni mali od koverti pipȃ i otresa bukin i slaže novinarski uskličniki i upitniki: 

Orko! Kega vranića delate tamo dole?!

Sȅ neč parćuje, ma ostale su va pamete njegoven Primorcon i se njegove lepe mikovske pjesmi ken je slagal besedi, a Nello Milotti pisal muziku. Obadva prijateli, partizani, antifašisti. Da bi čera po seh medijeh bilo z evropskega trona rečeno kako su i Istra, i Primorje, i Dalmacija, i otoki, još vavek taljanski! Na velo veselje od sȅh oneh ki nisũ preboleli ni četrdeset i treću, ni četrdeset i petu.

Kȁko se brzo povjest more presložit! Koliko j oka magnuće! Trip-trap! Puf! Onen našen sirotan nepozabjenen, ke su pod tujun zemjun ostale, suze opet teču.              

Ljubo Pavešić je rojeni čakavac, Škrljevčan, radijski novinar, publicist i čakavski pjesnik.
...

 

    Napomena: Članci iz Sušačke revije u Web izdanje ne prenose se kompletni, sa svim slikama, potpisima pod slike, okvirima, tablicama i sličnim. Za cjelovit uvid u članke pogledate papirnato izdanje. Hvala.

Povratak na kazalo © 2001-2019 Klub Sušačana