Dvajsetak let prihajan va vijećnicu Općine Lovran i saki se put zagledan va jenu sliku, ku j pred čuda let naslikal akademski slikar Rudolf Marčić. I saki put pomislin kako o njemu niš ne znan.
„Crkvica sv. Trojice na mulu u Lovranu” u vlasništvu je gđe Ade Car u Lovranu |
Jedan dan sedin tako va vijećnice i zagledana va sliku pomislin: „Baš me muči ča ne znan ki j bil Rudolf Marčić? Ne bi ta slika tolike leta bila tu na zide da za Lovran on ni bil važna ličnost.“
Kurijoža i „za miran san“ kako reču, počela san iskat početak nepoznate mi štorije aš mi se kraj prvi otprl. Rudolf Marčić počiva na lovransken cimitere. Pa gren do njega. Peja me Vesna Katić. Sprotu mi poveda štorije od seh pokojneh i poznateh ki su živeli okol njega, ale početak njigove životne priče ne zna ni ona. Potle mi je čuda pomogal internet, a neš su mi povedeli i lovranski prijateli s tega vremena. Doduše, si su oni već vremešni ale se domišjaju da su ga po domaći zvali Rudić. Nadimak govori da j moral bit drag i vesel čovek aš da ni ne bi mu tepali kako mićemu otroku, bil bi Rudolf al Rude, a ne Rudić.
Onda su se počele otpirat sliki njigovega posebe bogatega živjenja. Pravo mu je ime bilo Rudolf Ernst Marčić. Onega drugega imena Ernst ovde se niki ne domišja. To ime Ernst ne spominje ni Likovna enciklopedija Jugoslavije, ka je va Zagrebe tiskana1987. leta, a o Rudolfu Marčiću objavila je samo jenu crticu. Malo veću crticu s oba imena objavila je Istrapedija i tu su mi se počele otpirat stranice od njigovega živjenja kako kad čovek čita knjigu.
Rudolf Ernst Marčić je rojen va Litije, va Slovenije 21. febrara 1882. leta. Svojo ovozemajsko vreme finilo mu je teć va Lovrane 13. otobra 1960. Mir je našal na lovransken cimitere i šal va lepi spomeni. Najvažneje je da ni pozabjen, magar se o njemu malo manje zna. Ne zato ča ni zavredil više, nego samo zato aš je se manje oneh ki su se š njin kunpanjali, ken je bil učitel slikarstva, s kemi je bil prijatel, sused, rod... A vreme je storilo svojo.
Kad je Rudolf Ernst Marčić prišal va Lovran? I zaš je potle seh gradi va keh je živel zibral baš Lovran? Pa kade je se bil, ča je delal? Se su to pitanja na ka ni bilo odgovora dokle mi ni malo pomogal internet, malo prijateli. Pa neka sada neki reče da nan tehnika ne služi za dobro!
Rudolf Marčić je rojen va Slovenije. Va Litije je finil nižu gimnaziju, a onda kadetsku školu i postal je pješadijski časnik. Bil je to komać početak dvajsetega veka i ni se moglo zibirat ča ćeš, ča nećeš. Za so to vreme vuklo ga je slikarstvo. Slikal je celo to vreme, ma onako amaterski. A onda se dogodilo da j duša vrisnula i počel je iskat svoj put. Imel je sreću nać se pul profesora, najbojega ča ga je to vreme imelo, Vlahe Bukovca. 1905. leta upisal je va Prage Umjetničku akademiju. To je bilo najlepje i najboje ča mu se j va živjenju dogodilo. Otprla su mu se širon vrata likovnosti, umjetnosti ka je do onda mučala i čučela negdere doboko nutreh va njin. Aš da se ta muza od slikarstva ni na vreme probudila, on ne bi bil mogal za leto dan parićat svoju prvu izložbu va Prage. A bilo je komać leto 1906. Va dve je leta diplomiral i postal akademski slikar.
...