DEL TEBE
Va batani srid Kvarnera
naješkani parangal
ja kalivan i uživan
i s kurenton navigan
Parangal je zdola mora
na bonaci je sinjal
ja san legal priko banka
zduga gjedan rodni kraj
Ki profumi, ki kolori
s čen san ovo merital
se ča imaš, se mi davaš
niš ne išćeš za ljubav
Kako škrtac čuvan za se
tu lipotu doma svojga
se lipote, čuda svita
nisu sena kraja mojga
Va batani sred Kvarnera
naješkani parangal
ja kalivan i uživan
i s kurenton navigan
Saka ješka jedna želja
moja želja jedna je
da me pustiš da te ćutin
da ja buden del tebe
|
Gledan malo va ovaj tekst pa se pitan od kuda mi je se to palo na pamet i kako san uopće to složil, aš ja sebe ne vidin ko pisca stihova, a još manje ko umjetnika i važnoga va tom poslu. Se je to slučajno
Slučajno san tako va tandemu s Igorom Lesicom, tada frontmenom Grupe Kolaž, ki je napravil muziku i maestrom Andrejom Bašom ki je napravil aranžman, pobjedil na MIK-u 1998. leta s pjesmun „Kad san ti bila se na svitu“ ku je maestralno, ko i vavek, otkantala naša diva Radojka Šverko.
Jak je onda bil taj MIK, aš smo za par glasi dobili našu dragu Karin Kuljanić, pa onda su tu još bili Tereza Kesovija, Gustafi, Mladen Grdović, Šajeta, pa Vinko Coce s „Vilo moja“, ku danas kanta cela Hrvatska, a pjesmu je napisala naša draga, nažalost pokojna, Vlasta Juretić.
Tada san bil va forme jer san na tom MIK-u imel tekst za, također vrhunsku, Vivien Gallettu za pjesmu „Letnja noć“ i za Grupu Kolaž, pa san pomislel da san Gibonni, ali san brzo shvatil da nan je zajedničko samo ime, a da san ja miljami dugo zad njega.
Va toj san euforije, valje posle MIK-a napisal „Del tebe“ i taj tekst dal mome prijatelju Igoru Lesice, ki je napravil bar tri demo snimke s kemi on ni bil zadovoljan komentirajuć da je tekst daleko ispred njegovih predloga muzike, pa je kancona finila va škabelinu. Naš Igor se oženil, deca su došla i mi smo fermali delat. Zanimljivo je da se pjesma početno zvala „Kvarner“.
...