Opatija je va prven dele 2004. leta bila jeno velo gradilište, a njiji gradonačelnik je va sakoj prilike užal reć da je va najveće hrvacko gradilište uloženo preko 100 milijuni euri. Dobar del teh šoldi potrošen je da bi se renovirali, ale zgradili novi hoteli, pa je tako Opatija dobila hotelski kompleks Mirmar, Grand hotel Četiri opatijske rožice i hotel Savoy, a dela s i na hoteleh Palme i Astoria. Se drugo je uloženo va izgradnju nove liburnijske kanalizacije.
Najprvo se je pred ko leto kopalo va Volosken. Delo ni bilo storeno na vreme, judi su imeli čuda reklamacij, ma kad je taj mirakul finil i kada su si mogući svecki bageri i druga moda moderne tehnologiji prekopali kompletnu gornju, opatijsku Novu cestu i taj del Opatije pretvorili va Veneciju va mićen, kanal do kanala, nastali su pravi problemi.
Jako prometna gornja cesta i si oni judi ki bivaju uz nju, ale va još višeh opatijskeh naselji, ostali su odsečeni od sveta. Do domi nisu mogli z auton, a kako je bilo i dosti dažja, ni saki put bilo lahko ni prepasat preko improviziranega mostića od dasak. Jednosmerne ulici su privremeno postale dvosmerne, aš je vozit med bageri jako teško i da bi se bilo kamo arivalo, moralo se svjesno kršit prometni znaki i pravila. Ruku na srce, prvo vreme se je kopalo jako pomalo, a delalo se na dionice od križišća prema opatijskome groblju i naselju Kosovo, pa po celoj Novoj ceste i daje do Ičići.
Štorija za sebe je bil Lovran, ki je anke bil celi raskopan, neki deli i po dva puta, o turističkoj Medveje da se i ne poveda. Gradilište liburnijske kanalizacije je bilo rekordno velo, pa se va isto vreme raskopalo puneh osan kilometar ceste. Šest meseci je ta agonija durala, a judi su, navajni zdurat, se to trpeli mučeć, znajuć da se kanalizacija mora storit i da prez nje neće bit ni čistega mora, ni bojega turizma. Ma, kada već nisu mogli zdurat, počeli su njurgat, aš da je čuda tega moglo počet i raneje da su se karti storile na vreme i da je cela ta raskopana štorija mogla bit finjena prej turističke sezoni.