SUŠAČKA REVIJA broj 49

 


razmišljanja

BILA JEDANPUT JEDNA HARTERA

Kim Cuculić

      O Rike kot o industrijskon središtu danaska se leh more govorit va perfektu, ča će reć: bila j' Croatia Line, bil je Torpedo, bil je Rikard Benčić, pa Vulkan, pa Viktor Lenac, pa Tipograf i da dalje ne nabrajamo. Prošlost je i vojarna na Trsatu ka više neće bit simbol rata nego znanosti, dok je va napuštene hale Hartere i Torpeda već na vela vrata došla kultura. Još do pred deset i više let nismo ni misleli o ten da su to vredni primjerci industrijske arhitekture, aš se va njimi delalo i to j' bilo normalno. Onput je celo rečko gospodarstvo šlo va stečaj, al ča bi mi po domaći rekli – mater ženit. Delavci su poslani doma na čekanje i još vavik čekaju, neki su dobili otkaz i čekaju na Zavodu za zapošljavanje, a prazne fabrike pomalo postaju spomenici ki povedaju o nekoj boljoj rečkoj prošlosti. Kad su se va Hartere i Torpedu počeli održavat koncerti, predstave i izložbe, veli broj Rečana podržal je tu ideju, ma bivšin delavcimi ni bilo do slavja nego su takov potez više zeli kot komemoraciju. Kako se kolo povijesti više ne more vrnut nazad, morat ćemo se prilagodit novoj situacije. Se j' to, kako se lipo reče, povijesna neminovnost. Rika već nima industrije, ma zato ima velu, slavnu, nezaboravnu industrijsku prošlost. A kad ta prošlost dojde na red med prvima j', morda i prva, naša Hartera.  

    Napomena: Članci iz Sušačke revije u Web izdanje ne prenose se kompletni, sa svim slikama, potpisima pod slike, okvirima, tablicama i sličnim. Za cjelovit uvid u članke pogledate papirnato izdanje. Hvala.

Povratak na kazalo © 2001-2019 Klub Sušačana