SUŠAČKA REVIJA broj 54/55

 


opatija

SLAVNI OPATIJAC

Aleksandra Kućel - Ilić

    Biste i spomen-ploči za si oni judi ki su na neki način zadužili Opatiju, zadnjeh let se postavjaju na čuda mesti va grade. Tako je do sada spomenik pred ken se turisti litrataju dobila amerikanska balerina Isadora Duncan, a njiji je sused spreda hotela Kvarner postal i književnik Anton Pavlovič Čehov i još malo daje, po nekeh morda i preveć va hlade, slavni Mister Morgen, pokojni hrvacki kantur Ivo Robić. Poljski Nobelovac Henryk Sienkiewicz je dobil bistu blizu opatijskega mula, a poljski vojskovođa i državnik Jozef Pilsudski spomen-ploču va zelenile spreda Umjetničkega paviljona Juraj Šporer.

    Pred čuda let je spomen-reljef na crekve sv. Jakova, ki se more videt ako se prošeće po lungomaren, postavjen va čast dr. Theodora Billrotha, kirurga i utemeljitelja opatijskega zdravstvenega turizma, a va zadnjo vreme su postavljene i spomen-ploči Gustavu Mahleru i ing. Jakobu Ludwigu Münzu, graditelju jedne od najlepšeh liburnijskeh villi – Ville Münz va Ičićeh.

    Spomenuli smo samo neki znameniti judi ken se Opatija otela zahvalit va kamike, mramore, bronce i z nekoliko lepeh besed. Slavneh i poznateh je v Opatije bilo čuda, a pred par meseci je tu listu dopunilo i jeno velo ime poznato va celen svete – dr. Leo Sternbach, čovek ki je izumil Valijum i pokrenul novu eru va farmaceutskoj industrije.

    Veli izumitelj kemu se more zahvalit to ča danaska postoje leki za smirenje, bil je, najme, Opatijac i va ten je lepen grade provel celo detinjstvo... Kada je pasanega leta umrl va Merike, tisti je veli podatak prišal na svetlo dana, aš va njegovoj je biografije zavavek ostalo zapisano zlatnemi slovi: rojen v Opatije, 7. maja 1908. leta. Na kuće va koj je rojen i va koj je bival kot otrok, a to je kuća va koj je let i let delala legendarna opatijska butiga Julka, dokle je danaska na ten meste istoimeni kafić, postavjena mu je spomen-ploča z kun se sada Opatijci jako štimaju.

    Novu generaciju leki za smirenje, med kemi je Valium bil najprodavaneji lek va Amerike od 1969. do 1982. leta, dr. Leo Sternbach je zapravo otkril vadeć se pravila i tajne struki od svojga oca Michaela Abrahama Sternbacha, va ono vreme poznatega apotekara ki je v Opatije, va Bazare Mandria ki je bil na meste današnjega hotela i kavane Paris, držal apoteku.

    Povijest poveda da je dr. Sternbach stareji 1914. leta zaiskal odobrenje za patentiranje jenega svojga leka, ma mu to nisu odobrili. Z tega se vidi da je eksperimentiranje z različitemi kemijskemi sastojci va familije Sternbach bilo kako reć Dobar dan. Ma, dokle je otac žarko želel da mu sin upiše studij farmaceutike, mladi Leo Sternbach je fantaziral kako će upisat studij kemije. To je na kraje i uspel, pa je i diplomiral kemiju va Krakowe 1931. leta. A svetska farmaceutska industrija je zapisala kako su zapravo pokusi ke je Sternbach delal gjedajuć i vadeć se od oca va opatijskoj apoteke, prehitili njegovo ime i lik med najvažneji Amerikanci 20. veka.

    Va vreme kada je Leo Sternbach rojen, Opatija je bila pod austro – ugarskun vladavinun. Otac mu je bil poljski Židov, a mat Mađarica, Piroška Cohn va ku se je Michael zajubil dokle je bila na ferijah pul svoje noni v Opatije.

    Sternbach mlaji se j v ‘ Opatije školoval se do 1921. leta kada je zarad tega ča je ukinuto školovanje na njemačken zajike, nastavil školovanje va Grazu i pokle studiral va Krakowu. Zaradi ekonomskeh razlozi, socijalnega i političkega kaosa pokle rata i talijanske vladavine, cela se fameja preselila va Krakow.

    Leo Sternbach je pokle šal va Švicarsku kade je delal va laboratorije Lavoslava (Leopolda) Ružičke, dobitnika Nobelove nagradi za kemiju. Dobil je delo va centrali poduzeća La Roche va Zürichu i njegovi su židovski koreni potakli vodeći judi z te firmi da ga skupa z drugemi znanstvenici sakriju i prehite va Ameriku. Strahovalo se najme od ulaska njemačke vojski va Švicarsku.

    Njigovi se amerikanski dani ubrajaju med najplodneje va bogatoj karijere va koj je pod svojen imenon držal oko 230 farmaceuskeh patenti...

    A do kraja 2006. leta, Opatijci će, prema najavama odgovorneh va Grade Opatija i Turističkoj zajednice, dobit još nekoliko vredneh spomeniki. Restaurirana originalna opatijska opatijska Madonina će se tako pospravit va Villu Angiolinu. Spomen-ploču će dobit i grof Arthur Kesselstatt ki je 1891. leta nastradal va more pred Opatijun i od svoje matere dobil spomenik, kip žalosne Madone ka čeka svojga sina zavavek.

    Govori se i da će lepi reljef dobit i znameniti kompozitor Boris Papandopulo kemu je spomen-reljef parićala opatijska kiparica Tatjana Kostanjević, dokle će na Domu Liburnija va Volosken spomen-ploču dobit Svetozar Urban Vajanski, slovački pjesnik, novinar i političar.

    Napomena: Članci iz Sušačke revije u Web izdanje ne prenose se kompletni, sa svim slikama, potpisima pod slike, okvirima, tablicama i sličnim. Za cjelovit uvid u članke pogledate papirnato izdanje. Hvala.

Povratak na kazalo © 2001-2019 Klub Sušačana