Hoteli Lauriana, Danica, Miramar, Villa Elsa i se još neke lepe kući va Lovrane su još jenu turističku sezonu dočekale zaprte. Govori se da će tako i ostat do kraja 2006. leta, dokle se ne ariva rasvetlit štorijaka se je oplela okole Liburnia Riviera Hoteli.
Zaradi sega tega ča već let i let hita nazad lovranski kraji, si su se va Lovrane zmutili kada su pod kraj devetega meseca dobili treću nagradu za „naj-turističko mesto“ veličini do 5.000 turističkeh postej, va akcije Hrvacke televizijii Hrvacke gospodarske komori.
Judi ki živeju od turizma i va njega se razumeju, rekli su da je vredna nagrada prišla zato aš je Lovran va malo vremena arival preuredit i opret dosti šesneh objekti.
Uz lovranske vili Vjekoslava Martinka ki se je proslavil z Villun Astra va koj se j' snimala prva hrvacka sapunica Villa Marija, ma anke iz seoskin gospodarstvon Oraj zdola Lovranske Dragi, najprvo je korak naprvo storil Hotel Park, fameji Rukavina ka je prišla z Australiji nazad va Hrvacku, preurejen kako Bog zapoveda. Onput se j' na početke leta va Lovranskoj Drage otprl pansion i restoran Hotel Draga di Lovrana, kega j' otprl Christian Nikolac z famejun, a za ten je svetlo dana arivala ćapat i preurejena lovranska Gradska kavana, va koj su kapoti Alma Harašić Bremec i njiji muž NevenŽeljko Bremec.
Već otprej Lovran se diči i z luksuznun Vilun Eugenijun, a LRH su va novi veštid va 2006. lete obukli i Hotel Excelsior. Med svetlemi točkami je i luksuzna Villa Vera, va koj se more uživat i va Wellness centre, a još kad se va 2007. lete bude počelo preurejevat i nekadajno železničarsko odmaralište Meridional kega je kupila Ugo oprema i građenje i ki bi kada se otpre, moral nosit pet zvezdic, za lovranski turizam će se sakako opret jena nova stranica. Nikako se ne smeju pozabit i nadugo poznati lovranski ugostitelji i si oni ki daju svoj pečat temu da je Lovran z leta va leto se više poznat po fešte od maruna − Marunade, fešte od črešanj i po Šparugade.
A kako su va Lovrane opće počela turistička kretanja, pitali smo dr. Dušana Peršića, čoveka ki biva va Lovrane i skupa z ženun Mirjanun, ka je napisala knjigu od lovranskeh vili, doma čuva, zapišuje i od srca prati se ono ča je povijestvanašehkrajeh pustila.
Zaljubljenika va lovransku povijest smo pitali ča povedaju dokumenti i spisi keh čuva po svojeh škabelineh, ki je bil prvi hotel va Lovrane?
Dobili smo interesantan odgovor, va ken nan je dr. Peršić špjegal da se kako prvi hotel na opatijskoj rivijere vavek spominje Hotel Kvarner ki je storen v Opatije 1884. leta, ma je prava istina da je lovranska Villa Fernandea zapravo bila prvi objekt na celoj rivijere namenjen primanju turisti. Ta se je villa zgradila 1873. leta i va povijesti se je nekada zvala i Pension Stark i pokle, budući da je smeštena blizu ex Hotela Beograd (danas lovranski Hotel Bristol), bila je depandansa tega hotela i delala je va sklope LRH.
Devedeseteh let pasanega veka, Villa Fernandea je kako i čuda drugeh va Lovrane i Opatije, podkrov primila prognanici i izbjeglice, a pokle, kada su oni šli ća, više ni bila va stanje ugošćevat nikega, a najmanje turisti. Žalosno je, ma istinito, i da ovisti prvi hotel na rivijere, namesto da ga si hode pogledat aš je zaspraven bil prvi med prvemi, danaska stoji prazan i zapušćen.
Od duhtora Dušana Peršića smo ćapali još povijesneh podatki, pa nan je tako špjegal i zač je za Lovran bilo važno leto 1873. Gjedano z prometne strani, to j' bilo leto va ken su austrijske Južne železnice otprle železničku prugu z Svetega Petra na Krasu (današnja Pivka), do Reki. Z ten su se oprle nove mogućnosti za jači razvoj turizma, aš su Južne železnice otele uložit šoldi va turistički objekti i počet boje zarajevat od turizma.