SUŠAČKA REVIJA broj 60

 


opatija

FRANK HORVAT I ELIZABETH VON HORTENAU

Aleksandra Kućel - Ilić

Opatija je mići grad, ma su va njemu rojeni veli judi ki su postali poznati va celen svete. Jedan med njimi je i Frank Horvat, poznati modni fotograf ki je rojen v Opatije 1928. leta, a život ga je ponesal po celoj Evrope i zvan nje kade je postal priznat i na veloj cene. Litratal je i litratal saki svecki kantunić ki mu je bil oku drag i sa skoro 80 let života, doputoval je "doma", va grad z kega je potekal. To je bilo na kraje letnje sezoni 2007., va Tjedne židovske kulturi "Bejahad 2007.", kada je v opatijsken Umjetničken paviljone Jurja Šporera otprta izložba njegoveh modneh litrati. Pogjedali smo litrati, ma anke i poćakulali z autoron ki je va tako dobroj forme da mu niki ne bi dal 80 let. Nismo povedali hrvacki, aš ga nikada ni navadil, lego su besedi šle na inglešken, pa smo ih prehitili i na naš lepi domaći "ča"...

Mat i otac su mu bili duhtori i v Opatije su vodili sanatorij ki je delal va sadašnjen hotele Royal, okole kega ni do danaska ni finjen sudski proces ki bi rešil kemu zapraven pripada, tako da je onako zapušćen jena grda opatijska maća. Ma, va vreme kada je sanatorij, a kašneje hotel, bil lepo i šesno urejen, se je tu, poveda Horvat, bilo na svojen meste. Svoji je prvi dani življenja i rane mladosti, se do 11. leta provel v Opatije, ma kada se je proval domislet teh let kada je bil otrok, okril je da se zaspraven skoro ničesa ne more spametit. Najme, živel je va jenemu vremenu ko zbog svojeh židovskeh koreni ni ocenil kako srećno i mirno vreme i morda je se ča je bilo vezano za Opatiju na neki mod porinul ća z svoje memoriji. Cela familija je 1939. leta morala poć ća z Opatije i preselili su se va Lugano, va Švicarsku.

Kako je počel litratat? Povedel je da je kot otrok volel sakupjat marki i onput je s petnajst let svoju kolekciju zamenil za prvi foto-aparat. Životni put mu je bil određen i on je korak po korak hodil va svet fotografiji. Jeno osan let kašneje je za mesto svojga živjenja zibral Milano, kade je študiral umjetnost na Akademiji Brera i delal za reklamne aganciji. Prišparal je dosti šoldi da bi mogal kupit novi fotoaparat i počel je delat lepe sliki za talijanski foji i časopisi.

Grad va kega se je inamoral i va ken i danaska biva bil je Pariz, va kega je prvi put prišal 1950. leta. Od svoje karijere je povedel: - Bil san freelance fotograf, tamo na polovice pasanega veka i storil san puno dokumentarneh slik va Pakistane i Indije. To me je nekako odredilo i volel san da saka slika va sebe nosi i neku socijalnu poruku, da va njoj bude i neki socijalni, društveni moment. Pokle san let i let živel va Londone i litratal za Life i Picture Post, a još kašneje san živel zmed Pariza, New Yorka i Londona. Moje su  modne sliki objavljivali časopisi Vogue, Elle, Jardin des modes, Glamour i drugi, a bil san i suradnik Magnuma.  Putoval je po celen svete, ča mu se jako pijažalo, pa je tako počel delat i za njemački magazin Revue, izdal je libar intervjui z poznatemi fotografi 1988. leta, a leto kašneje je "otkril" i digitalnu fotografiju, s kun je malo pomalo počel delat eksperimenti. Sudjeloval je na se nekeh veleh projekteh, pa je tako storil sliki za libar Degasoveh skulpturi, kako i za libar o povijesti mode. Snimal je i skulpturi Roberta Couturiera za izložbu parićanu va muzeje Maillol va Parize, a svoje delo, svojeh 60 let va kumpanije z foto-aparaton je prikazal na veloj retrospektivnoj izložbe 2006. leta, ka se je zvala Horvatovi labirinti. Bila je postavjena va Francuskoj, va Espace Landowski, Boulogne - Billancourt. Se to se more pogjedat i na njegovoj internetskoj stranice.


Frank Horvat u opatijskoj galeriji Juraj Šporer
na fotografiji Sandra Rubinića.

A pored bogate karijeri, Frank Horvat je imel i bogat, moglo bi se reć i buran, ljubavni život. Koliko se je puti oženil, ni nan otel povedet, ma i njegove besedi da je to bilo "više puti", povedaju da ni bil vezan samo uz jenu, ale dve ženi ke bi obilježile njegovu intimu, a z teh je ljubavneh vezi na svet prišlo i pet dece.

Pitali smo ga ča ga više dopada - litratat na klasičan mod z filmon, ale više voli digitalnu fotografiju. Odgovoril je kako je vavek nastojal bit va sklade z vremenon va ken je živel, pa mu se j' bilo teško odlučit ča mu j' draže. I danaska, s 80 let, voli litratat za svoj gušt, a se sliki dela samo z digitalnun kamerun.

Na kraje, oteli smo znat kako mu se dopada današnje lice njegove rodne Opatije? - Jako mi je drago da san se vrnul va grad kade su moji koreni, kade san rojen i bival 11 let. Ovo je jedan lepi grad internacionalnega izgleda, jeno šesno mesto, ma onako po duše, mane se više dopadaju mesta va keh ni toliko turisti. Volin manje komercijalizirana mesta va keh se more pobeć kada ne oteješ videt nikega i kada se oteješ zaspraven škapulat od sega ča muči modernega čoveka. Opatija mi se bez obzira ča ni baš neko mirno i tiho mesto ipak pijaža, a najviše su mi za oko zapeli parki, čisto more i arhitektura - zapazil je Frank Horvat.

            ELISABETH NA GROBU NONE MARIJE

Marije Nanke mesec dan kašneje, v opatijsku Zlatnu knjigu se je upisala još jena poznata osoba ka je va svojeh mladeh letah bila vezana za Opatiju. Njijo ime je Elisabeth von Hortenau, ima 86 let i ni njoj bilo teško prit z dugega, z Ameriki v Opatiju, na grob svoje pokojne noni Marije, plesačice ka je bila prijatelica legendarne balerini Isadore Duncan.

- Kada san bila mića, sedela san va krile Isadore Duncan – povedela je Elisabeth von Hortenau o koj su čitatelji već mogli doznat više va pasanoj Revije. Ma, upoznat gospu koj je pranono bil brat cara Franjota Josipa ne dogaja se baš saki dan i zato eko još par besed o njoj Očuh njijega oca Alfreda, dr. Julius von Hortenau, je bil opatijski duhtor ki se je jako zalagal za izgradnju obalnega puta, lungomara od Opatije do Lovrana, ko je dofinjeno pokle dionici od Voloskega do Opatije. Povedela je kako je v Opatiju dohajala z pokojnun nonun ku je jako volela i kako je to grad va ken je prvi put jila naranči. Očuha od svojga oca, dr. Hortenaua se domislela kako dobrega čoveka ki je na neki mod prišal kako vela pomoć va štorije o jenoj zabranjenoj jubavi. Najme, veza na dvore zmed njije none, plesačice, i nadvojvode, carskega brata, je za plod imela dvoje dece. Kako se ne bi dogodil skandal, deca i njiha mat su bili "pospravni" kod jenega opatijskega duhtora ki je bil Židov i ki je na tisti mod ugovoril jedan dobar i unosan posal. Dobil je novo prezime, Hortenau, prehitil se na katoličku veru i oženil plesačicu Mariju, njiju nonu, posvojil njiju decu i dobil dve kući i tereni v Opatije. Te kuće su i danaska lepo očuvane, jena je na Slatine i zove se Villa Danijela, a druga je zmed hotela Kristal i Admiral. Va svojoj dugoj karijere, ka ni danaska ni finjena, Elisabeta Von Hortenau bavila s više tega, pa je tako bila glumica va Amerike i Meksike, delala za meksičku ambasadu i brinula za emigranti, pisala putopisne reportaži i bila vela humanitarka i zaštitnica blaga, a danaska se bavi z nekretninami i vodi pet restorani.

 - Iman 86 let i biznis mi je va krve, pa bin rada otpret i jedan šesni restoran z meksičkun kuhinjun v Opatije ka mi se jako dopada. Hoteli su v Opatije lepo urejeni, a dobra je i klima – rekla je von Hortenau, ma su opatijske gradske vlasti ipak ocenile da je njiji projekt preambiciozan za miću Opatiju, aš bi se tako veli restoran splatilo opret samo va neken milijunsken grade kakoveh va Hrvackoj ni.

Povratak na kazalo © 2001-2019 Klub Sušačana