SUŠAČKA REVIJA broj 65

 


opatija

NOVA ZLATNA KNJIGA OPATIJSKEH GOSTI

Aleksandra Kućel - Ilić

Prvi čovek ki se je upisal va novu Zlatnu knjigu opatijskeh gosti bil je aktualni hrvacki precjednik Stipe Mesić. To je storil va vreme kada je Opatija slavila 160 let turizma, 14. juna 2004. leta. Tisti je libar oprt za se znamenite jude ki va 21. veke, i daje, rada prihajaju v Opatiju i baš kako nekada - zibiraju "krajicu Jadrana" da bi va ten lepen turističken grade "napunili baterije", uživali va parkeh, šetali po lungomareh, banjali se va more, ma anke i ča šesno obavili od svojga posla.

Kada se govori od poznateh judi ki danaska prihajaju v' Opatiju, ne more se reć da su to se sami kraji, krajice i visoki državni dužnosnici z celega sveta, aš su ta leta pasala, ma si važni judi z sveta hrvacke politiki baren nekoliko puti na leto pridu semo.

Recimo, va Grand hotele Adriatic se sako leto održava Godišnji skup hrvackeh ekonomisti i tu pridu si predstavnici vlade i vodeći stručnjaci ki išću formulu "kako se zivuć z krizi i poć naprvo", kako podić proizvodnju, bruto društveni proizvod, turizam i se tako neč. Sako leto tako pride ne samo precjednik Stipe Mesić, leh i premijer Ivo Sanader i sa sila razneh ministri. Va to vreme, ma anke i va svojo slobodno vreme, po Opatije se more videt prošećat i guvernera HNB-a Željkota Rohatinskog i se još neke poznate jude, one ke se čuda puti, ako ne i saki dan, more videt na televizije.

Kada se poveda od moći i politiki na sveckoj razine, sakako treba reć da je ne tako davno v Opatije boravil i Otto von Habsburg. Nadvojvoda Otto von Habsburg je najstareji sin zadnjega austrijskega cara Karla I. i doživotni precjednik Paneuropske unije. Bliži se stotemu rojendanu, a Opatija ga je pred dve leta proglasila počasnim građaninom aš je sun svojun forcun podržal projekt Opatija - Grad muzej Srednje Europe. Štimani opatijski gost ki pripada dinastije Habsburgovci je bil gost na okruglen stole Habsburgovci v Opatije, ki se je va organizacije budimpeštanskega Instituta za istraživanje Habsburgovaca održal va hotele Miramar i uveličal otvorenje fontane austrijskega kipara Hansa Muhra, još jenega uglednika, ovistega puta z sveta umjetnosti, va isten hotele.

Na brojni kongresi keh v Opatije i dalje ne fali prihajaju i ugledni znanstvenici z celega sveta, a ovo je i grad od festivali, pa va vreme Dore, na koj se bira hrvacka kancona ka će nas zastupat i predstavjat na Eurosonge pred miljuni slušatelji, semo pridu se naše "zvezdi i zvezdice" - od Tonija Cetinskog, Maje Blagdan, Danijele Martinović, Petra Grašota, Doris Dragović i Gorana Karana sve do Vanne, Vesne Pisarović, Borisa Novkovića, Ivana Mikulića, Dadota Topića, Kraljeva ulice, Giulianna i Luke Nižetića, Massima Savića, a kada je jeno vreme Opatija bila i mesto kade se je dodjeljival Porin, tu je bilo više poznateh pjevači i kompozitori i drugeh judi od muziki, nego oneh običneh grajani. Tako se v Opatije moglo trefit Zlatana Stipišića Gibonnija, Severinu, ka i daje rada prihaja, si člani Parnega valjka i Prljavega kazališta, Olivera Dragojevića, Arsena Dedića i Gaby Novak, Josipu Lisac i još se neka poznata imena z hrvacke estrade. Za doček 2009. leta je sopla grupa Kad bi bio Bijelo dugme, ča bi reć Alen, Tifa i Bebek, člani nekadajnega popularnega sastava "Beli putac", kako bi se reklo po domaći Bijelo dugme.

Rada nastupa i gitarist Vlatko Stefanovski, a z sveta filmske industriji Opatija je, kako govore opatijski hotelijeri, ugostila i jako poznate "faci" kako ča su Kirk Douglas, Franco Nero, Michael York, Nastassja Kinski, Vanessa Redgrave, Tom Selleck, Peter Ustinov i Robert De Niro, pijanist Ivo Pogorelić, filmski producent Dino De Laurentis, grčko-taljanski slikar Giorgio de Chirico, a više puti je prihajal i Rade Šerbedžija, pa Zijah Sokolović, Pero Kvrgić i Ana Karić, Žarko Radić...

Kada smo već kod veleh imen z sveta šou biznisa i muziki, ne moru se preskočit i pjevači svetskega glasa ki su va zadnje vreme kantali ale sopli v Opatije. Bil je to gitarist Tommy Emanuel, pa onputa Chuck Berry, Zucchero, Bobby Solo, Paul Young...

Prihajaju i sportaši, pa su se v Opatije mogli videt i si člani plivačkeh ekipi ke su se natjecale na bazene na Kantride, cele kurijeri su ih bile pune, a rada prihajaju i nogometaši na čele z Slavenon Bilićen, pa tenisači sveckega kalibra. Med najpoznatejemi je Ivan Ljubičić, ki je v Opatije i kuću kupil, a tastina anke i hotel.

Bogati Rusi isto tako rada prihajaju va biser hrvackega Jadrana. Njin je najlepče kada va "prven rede do mora" kupe kakovu lepu staru vilu, a manje ih pijaža spat va hotele.

Prihajaju i misice, a v Opatije se neke od njih i zibralo na to prestižno mesto, od Branke Bebić, se do Anice Martinović. Opatija skoro sako leto ugosti i manifestaciju Miss Universe, pa je lepeh mladeh šinjorini videt na saken korake, a još pridu i frizeri, modni dizajneri, ponajboji hrvacki kuhari ki se natječu na Zlatnen kuhare i se neki z jet-seta. Tako mesto da opreš televiziju, samo prošećeš po Opatije i ako baš ne trefiš Blanku Vlašić, Ninu Badrić, ale Alena Vitasovića, more se dogodit da šćeto - neto natrapaš na Ninu Morić, Albertota Tombu, Janicu Kostelić...

Nedavno je v Opatije imela modni kasting, reviju i snimanje spota i nekadajna miss bivše državi, Bernarda Marovt, tu je sopal i slovenski kantautor Zoran Predin, va Kristalnoj dvorane hotela Kvarner su se tukli hrvacki, talijanski i slovenski fajteri, a na teniskeh tereni igrali svecki poznati igrači veterani.

Štorija za se je i Hrvacka ulica slavneh, na opatijskoj Slatine, kade su poznati judi dobili svoje zvezdi, a saki put kada se je otkrivala nova zvezda, prihajali su i laureati. Tako su prej lego su umrli, Opatiju svojin posjeton počastili zmed drugeh i Dragutin Tadijanović i Boris Dvornik, a med mlajemi, tu su bili Ivano Balić i još čuda njih. Na opatijskoj Slatine ostale su kako trajni spomenik na "judi od formata" te 32 zvezde i magari je celi projekt izazval dosti polemiki med domaćemi judi, ken ni do danaska ni ćaro kako su neki od teh laureati ki nimaju čuda vezi z Opatijun zibrani i dobili tu svojo mesto, delo je storeno i tako će ostat.

 

Povratak na kazalo © 2001-2021 Klub Sušačana