SUŠAČKA REVIJA broj 69

 


opatija

OPATIJSKE KAMELIJE

Aleksandra Kućel - Ilić

Dokle je se okolo Opatije još vavek bilo belo, mrzlo i obavijeno ledon, va parke Angiolina, pred najstarejun opatijskun vilun, srce su steplile cvatuće kamelije. Čuda ih je još bilo va pupe, ma prve su se črjene i roza rožice već bile otprle i va soj svojoj lepote pokazale sen ki su pošpijali kroz njihovu železnu kućicu. Najme, ovde trebe špjegat da opatijske kameliji va parke rastu obavijene ogradun, aš park nima noćnega čuvara i kako misle judi od struki, neki bi ih mogal napoštu rovinat, ale ne daj Bog pokrast, onako kako se po modernu reče »otuđit«. Da se takove grde štorije ne bi dogajale, i da bez potrebe ne bi dobile noge va opatijskoj firme Parkovi pred čuda let su ih rešili ogradit. I magari su do danaska pali se neki zidi i se neke ogradi po celen svete, ona od opatijskeh kamelij se ni maknula. Stoji tamo kade su ju pred let i let postavili.

Kamelija je va 19. veke bila jedan od najpopularnejeh cveti va francusken svete od modi. Kada su muški navečer hodili vanka i to va veštide, nosili su va zapučke i jednu rožicu – kameliju. Nismo našli pisani trag da su kamelije muški nosili va to vreme i v' Opatije, ma to nas ne bi začudilo aš je tisti grad već onda bil del Evropi i hodil je ruku pod ruku z evropskemi zimovališti i lječilišti. Pokle su kamelije šle vanka z modi i neko vreme ih ni bilo na veštideh, ma va vreme dizajnerice Coco Chanel, opet su »revitalizirane«. Muški su ih tako po njijoj ričete opeta počeli kladat va zapučak, a nosile su se bele kamelije, dokle su ih ženske nosile va vlaseh, ale kot puntape.

Neki misle da je to baš kako i rabi bit, drugi misle drugačje i rada bi da su kamelije slobodne. Ča je od sega tega dobro, a ča ni, morda bi najboje mogla reć štorija od drugeh opatijskeh kamelij ke su posajene malo daje od oveh najpoznatejeh, va ten isten parke, va noven parke prijateljstva blizu hotela Agava. Va toj lepoj oaze kade su se pred leto-dve počeli sadit grmići gracijozneh cveti, a rastu slobodni i bez ikakoveh železneh žic, neki su, a teško da će se doznat ki, počeli krast i zikopevat kameliji vanka. Tako da su va parke ostale samo škuji, namesto kamelij. I ča je sad boje, imet kameliji va žice, al pak ostat bez kamelij i smiron sadit nove?
Opće je poznato da je Opatija ovisti cvet izuzetne lepoti zela i kot simbol njijega turizma i općenito kot neki brand i dobru pozivnicu za seh ki još ne znaju kade prit na odmor. Aš ča ćeš lepše nego turiston prodat štoriju po koj je Opatija pravo mesto za napunit bateriji, kada su tu zime tako mehke, da i kameliji cvatu lepše i bogateje nego drugde po svete...

Va turističkeh brošurah i knjižicah piše da je kamelija opatijski simbol službeno postala tek va noveje vreme, negdere od 1974. leta. Znači da su ove cvatuće sadnice ke se z leta va leto se više šire i rastu va grmićeh, ove rožice keh struka zove i camelia japonese, opatijska »pozivnica« za seh ki rada prihajaju, više od 35 let.

Pasano leto je Udruga ljubitelja kamelija Iginio Scarpa z Opatije ka je nova, ma već ima dosti člani, po prvi put parićala i natjecanje va ken se je zibirala najlepša kamelija cele Opatijske rivijere, ča bi reć da su se mogli prijavit si ki doma uzgajaju lepi cvet, od Brseča do Voloskega. Žiri je zibral najlepši cveti i nagradil uzgajivači na izložbe Kamelije Opatijske rivijere ka se je parićala va trećen mesece, va marče ki je i mesec kada kamelije najboje cvatu i kada su najlepče.

Ma, ovde trebe reć i da kamelije po keh je ovisti grad danaska poznat, nisu ovdeka od čera. Kako povedaju stareji, a podaci postoje i va tiskanoj forme, zima se za pravo da su kamelije prišle v' Opatiju va ono vreme kada se je počel formirat i poznati opatijski park. To je bilo malo pokle 1844. leta, kada je rečki patricij Iginio Scarpa počel obdelevat i semi mogućemi biljki i stabli z celega sveta formirat okućnicu od Vili Angiolini ka se je tega leta zgradila.

Vila je odvavek bila »pojam«, bila je ono ča bi se po modernu reklo brand i to ne samo med njijemi zidi i kamari keh su obašli znameniti judi z tega vremena, nego je imela i park va ken su rasle, a i do danas je ostalo tako, se moguće sorti retkeh drevi i cvatućeh grmi, baš kako i mediteranskeh sorti. A kako je va vreme kada je živel Iginio Scarpa va modu prišlo va vrteh sadit kamelije, i saki je bogataš i boje stojeći čovek moral imet tu lepu rožicu va svojoj »zbirke«, tako je kako zgjeda razmišljal i vlasnik Vile Angioline i tako dobavil sadnice. Posadil ih je va svoj vrt ki je z vremenon prerastal v opatijski park. Naručil je svetskemi moreplovci da mu za zeleni kantunić raja prnesu se moguće sorti dišećeh i manje dišećeh sorat, pa su tako prišle i do danaska va njemu ostale ne samo palmi, bambusi, pinije i sekvoje, nego i poznate magnolije i kamelije.
Ni tisti cvet kamelije bil samo lep, graciozan i cvatuć va vreme kada drugi cveti još spe, kada se va arije još ne ćuti proljeće i kada je još rano za na more poć, nego je tajna njijega uspjeha bila i va medijskoj promocije ku su počeli književnik Alexandar Dumas z romanon Dama s kamelijama i kompozitor Giuseppe Verdi z operun Travijata. Tako i Opatiju užaju zvat stara dama, po ten ča je va njoj rojen hrvacki turizam, a neki užaju dodat i stara dama s kamelijami, ča bi reć da se Opatija i kameliji lepo kumpanjaju i va toj skladnoj štorije živeju skupa kroz sa ta leta do danas.

Da je Opatija va zadnjeh pedeset let počela se boje reklamirat svoje ime vezano uz rožicu kameliju, pokazuju i se neki drugi projekti, ale proizvodi ki nose to ime. Tako se v Opatije more nać i restoran ki nosi ime Kamelija, postoje hotelske dvorani ke se isto tako zovu, a i pekari su se domisleli i jenoj sorte odličnega peciva ko i zgjeda kot kamelija, dali to ime. Postoji i klapa ka nosi ime Kamelija, a pasanega leta je v Opatije održan i Kamelija kup, natjecanje mladeh, budućeh kuhari i slastičari.

Camellia japonica, ale japanska kamelija je va Evropu prišla z Japana i Kine negdere va 18. veke, a va libreh se more pročitat i to da je ime dobila po jezuite Cameluse ki ju je navodno pronašal na Filipineh. Sorti ovega nezaboravnega cveta križale su se med sobun, tako da je va moderno doba prišlo vanka i do nekoliko tisuć razneh vrsti i podvrsti.

Crvene su, roza i ponekad bele, a čuda njih ki vole tistu rožicu i općenito guštaju va njijen cvate, zabjeno gjedaju i va mešane, al šatirane kameliji. Prava krajica med rožicami. Rožica nad rožicami.

Kada kamelija ocvate i cvetići ki su se onako lepi so to vreme pokaževali sen ki pridu v Opatiju i sen ki ih morda i doma uzgajaju, opeta od teh čarobneh kamelij pride nova štorija vanka. Najme, kada va parke, ale vrte otpadaju latice, na pode se stori jedan tepih va boje. Tepih od kamelij.

Ma, ako je neki pokle sega pomislel da je kameliju lahko zgojit i se do grmića podignut, judi ki se bave hortikulturun povedaju da to i je i ni tako. Govore da se kamelije moru dobro ćapat samo ako je mesto kade ih se posadi vlažno i teplo, a ako se govori od mediteranskega podneblja, reču da tisti cvet ne voli čuda jakega sunca, leh mu se više pijaža bit va hlade. More podnest niske temperaturi i do minus dvajset zdola ništice, ma njoj ni dobro ako tako niske temperaturi poduraju i sakako joj nadzemni del rabi obuć va »kapot«. I onput će cvast od zimi se do kasnega proljeća i teplit srca va ono vreme kada se zaspraven nose kapoti, a sa mesta okole Opatije kamelije snuju, ma sneg bušuju.

Povratak na kazalo © 2001-2024 Klub Sušačana