SUŠAČKA REVIJA broj 72

 


lovran

MARUNADA VA ODABRANEN DRUŠTVU

Aleksandra Kućel-Ilić

Marunada je storila ono ča drugen ni šlo za rukun. Arivala je preskočit domaće granice. Va Lovrane  i celoj susešćine ka je bogata z voćnjaki ovistega ukusnega, hranjivega i jedinstvenega ploda od jeseni, kako i po celoj Liburnije i na hrvacken područje. Na oktobarsku manifestaciju, ka se 2010. leta održala po 37. put, čuda njih voli i rada pridu na nju. Tri zadnja vikenda va deseten mesece garantiraju dobru zabavu uz domaću muziku i gušti uz slatki plodi pripravljeni na si mogući modi, od onih najjednostavnejeh, tradicionalneh, do oneh modernejeh i puneh mašte. Da je Marunada zaspraven neš specijalno i jedan lep i poseban doživljaj, videli su i engleski novinari ki su pasanega leta bili del cele štorije i odlučili afirmirat ovu gastronomsko-turističko-sportsku manifestaciju i vanka njijeh dosadašnjeh okviri.

Tako je malo prej ovoletnjega izdanja Marunade po Lovrane na sa zvona  odjeknula novitada da je po ocjeni engleskeh novin Guardian lovranska fešta od slatkeh jesenskeh plodi svrstana med deset najbojeh europskeh gastro festivali za jesen 2010. godine. Laskave i  šesne besedi objavjene su va priloge Observer tiste ugledne novine, a svetlo dana su ugledale 12. septembra. Va članke ki je po čuda tega odličan za budućnost Lovrana i njegove najperspektivnije manifestacije, navodi se deset top gastro destinacij za ovu jesen ke bi rabilo obać.

Med podaci ki povedaju od sameh gastronomskeh priredbi, opisane su i karakteristike podneblja va ken se festival odvija, baš kako i prometna povezanost, ča bi reć mogućnosti kako arivat do destinacije. Va kumpanije od najpoznatejeh europskeh jesenskeh festivali, uz lovransku Marunadu, našal se i Festival špeka ki se održava va talijanskoj St. Maddaleni, Festival meda va francusken Roquebrune-sur-Argens, Festival pozabjene verduri va francusken Haye-de-Routeu, Festival voća i jabukovače va norvešken Hardangeru, Festival tikvi va talijansken Piegaiou, Festival kostanja na grčkoj Kreti, Festival čili paprike va francusken Espelettu, Festival lješnjaka i kestena na talijanskoj Sardiniji kako i Festival maslina va španjolskoj Mallorci. Va društvu najatraktivnijeh europskeh destinacij ke trebe obać ove jeseni spominju se i tri najatraktivnije gastro destinacije va Velikoj Britaniji, i to Food Glorious Food u Suufolku, Festival jabuke,  na ken se nudi tristo vrsti tog ploda, i Veliki zeleni gastro festival u Sjevernom Yorkshireu.

Veruje se da će objavljeni tekst imet i lep odaziv kod čitalačke publike ka voli putovat, a kako se zna da je Lovran već čuda let omiljeno mesto za vijaji engleskeh turisti, more se lahko dogodit da će ih ovo leto bit još više. Uz datum kada se parićuje lovranska Marunada, va članke iz Guardiana, istaknuti su i podaci ki govore o samemu Lovranu, o klime, gastronomije, Marunade, baš kako i o sportsko-rekreativnemi mogućnosti podneblja. Preporuča se i smještaj va seosken gospodarstve Oraj na padinah Učke, a samo deset minuti dugo od centra Lovrana. Uz se druge korisne informacije, čitateljima je prezentirana i točna informacija od tega kako doputovat do Lovrana, a preporučuje im se da koriste letovi Ryanaira z Londona za Pulu, ka je udaljena 99 kilometri od Lovrana.
– Obilježavanje Marunade započinje u Lovranu, a potom se seli u obližnja sela Liganj i Dobreć. U doba održavanja festivala na ulicama grada nude se razne kreacije od maruna, sladoled od maruna, kolači, med, a u ponudi restorana nalaze se specijalni meniji s tim jesenskim plodovima. Tako se može kušati ramstek sa preljevom od maruna, palačinke sa marunima, pa čak i juha od maruna... Trg Brajdice bit će centar događanja na kojem će nastupati bandovi i folklorni ansambli – ističe se u članku iz poznatih engleskih novina.
– Ovo je prva prava i zaista velika međunarodna afirmacija Marunade. Velik je to uspjeh, a pogotovo kada se uzme u obzir da su sredstva koja se dobivaju od države i Primorsko-goranske županije za ovu manifestaciju vrlo skromna. Možda će se neki začuditi, no samo ovim napisom i besplatnom reklamom u engleskim novinama Hrvatska i Kvarner dobili su pedeset tisuća eura. Nažalost, neke još potpuno neprepoznatljive turističke proizvode županija bolje pomaže nego lovranske gastro manifestacije, Marunadu i Dane šparuga, koje  postaju prepoznatljive u svijetu –  zapazil je direktor Turističke zajednice Općine Lovran Vojko Brubnjak.

Ovoletnje, tridesetisedmo izdanje Marunade, uz gastro specijalitete ponudilo je i sportsko-rekreativni sadržaji. Reklo bi se - za sakega po neš. Glavna, centralna fešta bila je po užance va Lovrane na trgu Brajdice kade je bil celodnevni program folklora, nastup puhačkih orkestri i sopnjada, uglavnon zabavne muziki. Za ten se za drugi slatki vikend Marunada preselila va Dobreć, a zadnji se vikend fešta od maruna održala va Lignje. Sportski del Marunadi bil je sastavljen od avanturističke utrki Učka Mountain Trek, planinarskega pohoda na Učku, a isto tako i mountain bike ture od Lovrana do Lovranske Drage, Lignja i Dobreća, kako i boćarskega turnira i susreta oldtimeri.

Zadovojni smo. Marun je čuda zdrav je i kvalitetan. Bil je to jedan jako dobar urod, morda najboji va više zadnjeh let. Bila je to jedna prava, gospodska Marunada, rekal je Adriano Gržević, jedan od najpoznatejeh uzgajivači maruna na lovransken terene i vlasnik lepeh voćnjaki od pravega maruna. On je poznat i po još nečeren, a to je da je njegova ona "vela padela" va koj se va isti mah more speć i više od trejset kil maruna. To je ona ista padela i va koj se pripavja "vela fritaja" od tisuće jaj i diveh šparugi pobraneh va domaćen, primorsken kraje.

Da bi se va veloj padele marun mogal speć onako kako Bog zapoveda, trebe ga peć nekeh 35, morda i 40 minuti. Pravi je recept da se marun mora jedan sledić "spotit", treba ga pokrit i jeno dva puti obrnut da bi bil sladak i da bi imel si svoji gušti.

A marun je kot lovranski tartuf reču da je jako dobar afrodizijak. Zato ga trebe z gušton provat i pokle povedat i preporučit ga sen drugen...

Za razliku od pasaneh vremeni kada su na Lovranšćine si klatili marun, danaska to već ni tako, aš se je čuda tega promenilo, pa i užanci. Živjenje gre naprvo, pa se marun već ne klati, lego ga se pobira pod marunon. Da bi se od maruna moglo storit slatko, ale ga speć va padele, najprvo ga se mora znet z bodjate žajice ako ni sam pal vanka z nje. Lovranski "judi od maruna" će isto tako ure i ure provest va napornen čišćenju plodi i njihoven parićevanju za slatko pripravjat. Ale, prej nego se marun stavi peć, trebe ga zarezat, pa je i to jeno dosti velo delo va ken se more zaposlit cela fameja.

A ča se se parićuje od maruna? Ma, ki ima voji, more parićat kompletan meni. More se skuhat juha, glavni pijat i desert. Samo trebe znat kako, a kada je va čoveke jubavi za kuhat i parićevat deliciji, najde se i mod kako.

Judi z Lovrana i okolice se jako štimaju z svojmi staremi maruni i vavek ponavjaju kako je "marun - marun" a nikako kostanj. I zato već više let delaju na ten da se ne dogaja to da se na Marunade pod marun nudi kostanj.


Ča se sve parićuje od maruna?!

Povratak na kazalo © 2001-2019 Klub Sušačana