SUŠAČKA REVIJA broj 74/75

 


opatija

NAJSTAREJI BARKAJOL

Aleksandra Kućel - Ilić

Ja san Kastavac rojen na Volosken. Kupil san barku pred puno let najprvo zase, aš me to pijažalo. I tako san počel. Školu san hodil va Kastve, i to osmoljetku, a pokle san finil zanat za automehaničara. Malo san se s ten bavil i onda san počel ovo drugo delo. Postal san barkajol. A je, pasalo je već od tega sigurno trejset, a rekal bin i trejset i pet let. Pred teh trejset i pet let, turizam je v Opatije bil puno, puno boji nego danas. Bilo je više judi, više gosti je prihajalo, više su nas iskali.  Gosti su čekali nas, a sada je prišlo vreme da čekamo mi njih – povedal nan je Miljenko Jardas, sa svojeh 67 let, najstareji i zadnji od stare garde opatijskeh barkajoli. Kako je nekada bilo va mićoj barčice popejevat gosti po Kvarnere, a kako danas i ča se je to promenilo va svete ki je ća hitil romantiku, a pod svoje zel brzo živjenje puno stresa, povedel je v ovistoj štorije.


Miljenko Jardas, najstareji opatijski barkajol.
Fotografija Marina Aničića

Od kad postoji Opatija, postoje i barkajoli. Počeli su na vesla, z mićemi barkami, pa su onda prišla jedra, a kada su van prišli manji motorići, počeli su vozit barki z motori. To je opatijska tradicija i opatijska legenda. Pokojnega Marinota Filaferrota se jako često domišljan. On je bil prava legenda med barkajoli v Opatije. Trebalo bi mu stvarno podignut jedan spomenik, već je i doba da se to stori. To ne košta puno soldi. Ako trebe, ćemo i mi se to složit i va Portiće mu podignut taj spomenik. Zaslužil je to. Pokle njega tu su bili pokojni Paragvaj, pa Ukić, isto tako već pokojni, ali Marino – on je stvarno bil legenda. Celi život je delal va Portiće kade san i ja jedno vreme bil, a delo je nasledil od pokojnega oca ki je isto bil barkajol. Kada je umrl, njegova se je barka prodala...

SR    Ča mora imet dobar barkajol, pitamo čoveka ki je va ten dele, a moglo bi se slobodno reć "cel svoj život"...

MJ   Mora znat malo govorit ne samo hrvacki, nego i strani jeziki. Njemački, talijanski, engleski... Mora bit uljudan, pristojan i vavek dobre voji bez razlike štimaju mu gosti al ne. Aš mi smo tu prvenstveno za njih i moramo njin bit na usluzi i zadovoljit ih ča se više more.

SR     A gosti nekada i danas? Kada su bili boji?

MJ  Nekada su se gosti voleli malo propejat z barkun po Kvarnere. Bili su puno više zainteresirani, pogotovo familije. Od Voloskega do Brseča – popejevali smo ih va miće uvale, va lučice kade su se kupali. Čekalo ih se celi dan, a oni su se kupali i pokle smo si skupa šli nazada. Šlo se i na Cres, na Krk...

    Napomena: Članci iz Sušačke revije u Web izdanje ne prenose se kompletni, sa svim slikama, potpisima pod slike, okvirima, tablicama i sličnim. Za cjelovit uvid u članke pogledate papirnato izdanje. Hvala.

Povratak na kazalo © 2001-2019 Klub Sušačana