Opatija je poznata kot mesto va ken se judi vole bavit z športon i rekreacijun, a 2013. leto će zapametit po ten ča je dobila svoju prvu pravu multifunkcionalnu dvoranu za šport, ka nosi ime jenega sportaša i branitelja poginulega va rate, Opatijca Marinota Cvetkovića.
Va zimsko vreme, kada je saki kantunić kvarnerske perli obučen va tepli veštid, pak više ni pravo vreme za šećat i teć na oprten, judi od mota sada se moru bavit sporton va tisten velebnen objekte na Lipovice.
Ma to ni se. Opatija ima još neč ščen se more pohvalit. Ima svoj program Zima v' Opatije, a to je program ki nudi jenu lepu aktivnost va neken noven svetle. Najme, kad pride vreme za tistu manifestaciju, nećete verovat, ma ovo je živa istina – Letnja pozornica se va samo nekoliko dan dobrega dela – preobuče va Zimsku pozornicu.
Kako smo doznali, ovistega leta i na početke 2014., Zima v' Opatije će, kada se govori od onega ča će se dogajat na Letnjoj pozornice, bit od 1. decembra se do 13. januara. Bit će va ten programe za sakega neš, za decu najviše aš ovo i su dani va lete rezervirani za njihov gušt (prihajaju Božić i Novo leto, a školske feriji ih lepo kumpanjaju). Ono ča će seh kuntentat, aš bilo je tako i va pasanoj Zime v' Opatije, je klizalište na Letnjoj pozornice, va prven rede do mora. Spustiš se do Letnje pozornici, obuješ klizaljki i neš malo platiš, a gušt je tako veli – zima šćipje za obrazi, a ti kližeš i điraš, drsaš po veloj ledenoj pozornice z dihon mora i soli.
To je jeno od retkeh klizališti va Hrvackoj smešteno puli mora, a prvi sused mu je još jedan novi, ekskluzivni opatijski hotel, butik hotel Bevanda ki ima deset šesneh kamar, a jena med njimi nosi ime Isadore Duncan, balerini ka je pred čuda let spala va opatijsken hotele Amalia i na vrhunce slavi govorila da je za svoji plesni pokreti inspiraciju našla va opatijskemi palmami. Ki zna ča bi rekla da je mogla videt opatijski led pul mora, ale ga još i oćutit i na njemu tancat, onako graciozna kakova je bila?
Kada je pasanega leta va grad prišlo klizalište, si oni ki su prej morali poć do Reki, ale va Delnice da bi provali drsat po lede, mogli su se va tajne tistega sporta uputit i doma, v' Opatije. Nisu klizala samo dečina, leh i odrasli, a za seh ki su oteli malo boje navadit kako se to dela, organizirana je škola klizanja ka će bit i v' ovistoj zimskoj sezone.
A da ne bi neki pomislel da će Opatija imet samo tistu "ledenu čaroliju" na Letnjoj i da će zima bit samo va ten znake od ledenega športa, tu trebe reć još i da će se va "prven rede do mora" parićat još i Božićni samanj na ken će se va vreme Adventa moć kupit se ono ča se more regalat za blagdani juden keh voliš, a isto tako i kartulini, balotice za na borić klast i još čuda drugega. Na samnje će bit i kuhanega vina za popit i teple cikulati i ako se bude onako kako je bilo lane – se to skupa neće bit preskupo i saki će moć va ten guštat.